O'zbekistondagi ilk trolleybus tarmog'i 1947-yil noyabrida Toshkent shahrida ishga tushgan edi. Keyinchalik O'zbekistonning Samarqand (1957), Olmaliq (1967), Andijon (1970), Farg'ona (1971), Namangan (1973), Buxoro (1987), Nukus (1991), Jizzax (1998) va Urganch (1998) shaharlarida ham trolleybus qatnovlari yo'lga qo'yilgan. Farg'ona, Namangan va Urganchdagi trolleybus yo'nalishlari nafaqat shahar ichida, balki undan tashqarida ham qatnagan.

Tabiiyki, eng katta trolleybus tarmog'i Toshkentda bo'lgan. Mustaqillik arafasida Toshkentda 25 ta trolleybus yo'nalishi, 450 ga yaqin trolleybus bo'lgan. Mustaqillikning ilk yillarida Chexiyadan 141 ta yangi "Shkoda" trolleybuslari olib kelingan. Deyarli butun shaharni qamrab olgan trolleybus tarmog'i toshkentliklarning sevimli transport vositalaridan biri hisoblangan.

Hukumatning 1999-yilgi qaroriga asosan, 2005-yilgacha yana yuzlab trolleybuslar olib kelinishi kerak edi. Nafaqat Toshkentda, balki O'zbekistonning boshqa shaharlarida ham trolleybus tarmoqlari rivojlantirilishi ko'zda tutilgandi. Ammo nimadir bo'ladiyu (nima bo'lganini hech kim bilmaydi), elektrotransport rivojiga e'tibor birdan susayadi.

Trolleybus zavodi qurilishi to'xtatiladi, Chirchiq, Guliston, Qo'qon, Termiz, Qarshi va Navoiyda trolleybusni yo'lga qo'yish loyihalari bekor qilinadi (bekor qilinayotgan vaqtida Navoiydagi loyiha 90 foizga tayyor edi, Buxoro-Kogon trolleybus yo'li esa ishlayotgandi). Yangi troleybuslarni sotib olish shartnomalari ham yo'qqa chiqadi. Toshkentdagi trolleybus depolari birin-ketin yopila boshlaydi.

2010-yilga kelib Toshkent trolleybusi mashinalari asosan eskirgan, yo'lovchi oqimi katta bo'lgan magistral liniyalari yopilgan, talabgir yo'nalishlar bo'yicha yo'lovchi tashimaydigan, umuman olganda, tugatilsa ham birov sezmaydigan bir transportga aylantirib bo'lingandi. 2010-yilning 29-aprel kuni ishga chiqqan, depo raqami 2567 bo'lgan 6-yo'nalishdagi mashina Toshkent tarixidagi (hozircha) so'nggi trolleybus hisoblanadi.

Bugun O'zbekiston bo'yicha faqat Xorazm viloyatida trolleybus faoliyati saqlab qolingan. Ammo Urganch va Xiva shaharlari orasida qatnovchi trolleybuslarga ham oson bo'layotgani yo'q — bu yil qishda hatto bir muddat ishlamay qoldi. Umuman, nafaqat poytaxtda, balki O'zbekistonning boshqa shaharlarida ham trolleybuslarning tugatilishi xato qarorlardan biri sifatida ko'riladi.

Toshkentda 2023-yil bahorida o'sha xato qaror oqibatlarini nisbatan yumshatuvchi voqea yuz berdi — O'zbekiston poytaxtiga Xitoydan yuzlab elektrobuslar olib kelindi. Bir vaqtlar trolleybuslar yurgan yo'llarda endi yangi zamon elektrotransporti — elektrobuslar harakatlanmoqda.