Апрель ойининг ўзида Ўзбекистонга 65 та электромобиль импорт қилинган. Бу Давлат статистика қўмитасининг маълумотларида акс этган.
Жорий йилнинг дастлабки тўрт ойида мамлакатга 156 та электромобиль етказилган. Бу 2020 йилда (131 та) жами импорт қилинган автомобиллар сонидан кўп ва 2019 йилга (39 та) нисбатан тўрт бараварга ортиқ.
Электромобилларнинг кўп қисми Хитойдан — 119 та олиб келинган. Кейинги ўринлардан Туркия (24 та), Жанубий Корея ва АҚШ (4 тадан), Германия (3 та), Литва ва Испания (1 тадан) жой олган.
Ҳудудлар кесимида эса январь-апрель ойларида 150 та электромобиль Тошкент шаҳрига тўғри келмоқда. Самарқанд ва Андижон вилоятларига — 2 тадан, Тошкент ва Сирдарё вилоятларига эса — 1 тадан келтирилган.
Йил бошидан бери электромобиллар импорти 3,4 млн долларни ташкил этмоқда.
Электромобиллар импортига акциз солиғи ва божхона тўловлари қўлланилмайди. Ҳозирда депутатлар сотиб олинадиган ва вақтинча олиб келинадиган электромобилларни автотранспорт учун йиғимлардан озод қилиш бўйича Солиқ кодексига ўзгартириш киритиш масаласини муҳокама қилмоқда.
Ҳукуматнинг декабрдаги қарори билан электромобиллар учун зарядловчи станцияларни ўрнатиш бўйича «йўл харитаси»ни ишлаб чиқиш режалаштирилган.
