Бугун, 13 октябрь куни Jurabek Laboratories МЧЖ қўшма корхонаси томонидан ишлаб чиқарилган хитой-ўзбек вакцинасининг 1 млн 219 минг 510 дозалик иккинчи партияси Санитария-эпидемиологик осойишталик ва жамоат саломатлиги хизматига етказиб берилди. Бу ҳақда ССВ ахборот хизмати хабар берди.
30 сентябрь куни мазкур корхона томонидан ишлаб чиқарилган ZF-UZ-VAC2001 вакцинасининг 1,4 млн дозаси СЭС хизмати вакилларига топширилган эди.
Шунингдек, кеча «Спутник V» вакцинасининг биринчи партияси 260 минг 500 дозада СЭС хизмати вакилларига топширилган.
Шундай қилиб, Ўзбекистонда эмлаш жараёнларида фойдаланилаётган жами вакцина 29 млн 893 минг 038 дозани ташкил қилмоқда.
Улардан 1 млн 594 минг 480 дозаси AstraZeneca, 23 млн 177 минг 998 дозаси ZF-UZ-VAC2001, 720 500 дозаси «Спутник V», 3 млн 060 дозаси Moderna, 1 млн 200 минг дозаси Pfizer/BioNTech, 200 минг дозаси Sinovac вакцинасидир.
Шундан 22 млн 956 минг 058 дозаси эмлаш жараёнларида қўлланилган. 5 млн 328 минг 121 нафар аҳоли коронавирусга қарши барча босқичларда тўлиқ эмланган.
Июль ойида «Газета.uz» Ўзбекистонда август ойидан бошлаб коронавирусга қарши хитой-ўзбек вакцинаси ишлаб чиқариш бўйича меморандум имзоланишига келишилгани ҳақида ёзган эди. Биринчи босқичда ойига 10 млн доза вакцина ишлаб чиқариш ва кейинчалик бу кўрсаткични йилига 200 млн дозагача олиб чиқиш кўзда тутилаётгани айтилган.
Август ойида Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC 2001 ва «Спутник V» вакциналарини давлат рўйхатидан ўтказишга розилик бергани ҳақида ҳам хабар берилган.
Эслатиб ўтамиз, 1 ноябрга қадар аҳолининг 70 фоизини эмлаш режалаштирилган.
