Ўзбекистонда 2023 йилда ҳаво кемаларининг қўниши ва жўнаб кетиши вақтида лазер нурлари билан халақит қилиш бўйича 10 та ҳолат қайд этилган. 2024 йилнинг 1 январидан 10 майига қадар эса яна 6 та ҳолат қайд этилган. Бу ҳақда Uzbekistan Airports матбуот хизмати «Газета.uz»га маълум қилди.
Бундай авиация ҳодисалари статистикаси самолёт экипажларининг маълумотларига асосланади.
«Газета.uz» мухбири шу йилнинг 5 апрель куни Тошкентдан учаётган рейсда шундай ҳолатлардан бирига гувоҳ бўлди (фотосурат юқорида, маълумот ҳуқуқни муҳофаза қилиш органларига юборилган).
Компаниянинг таъкидлашича, лазер нурлари йўловчилар ва ҳаво кемаси экипажи аъзоларининг ҳаёти ва соғлиғига зарар етказиши ва хавф туғдириши мумкин.
2013 йил 1 мартдан Ўзбекистонда лазер нурлари кўрсаткичлари сифатида ишлатиладиган портатив лазер эмитентларини олиб кириш ва сотиш тақиқланган.
2016 йил апрелда ердан туриб самолёт учувчиларига лазер нури орқали шикаст етказганлик учун жавобгарлик жорий этилган.
Ҳаво кемасидан фойдаланиш вақтида лазер нурини йўналтириш орқали халақит берганлик учун Маъмурий жавобгарлик тўғрисидаги кодекснинг 116−1-моддасида жавобгарлик назарда тутилган. Бунда БҲМнинг 100 баравари (34 млн сўм)дан 200 бараваригача миқдорда жарима ёки 15 суткагача қамоқ жазоси қўлланади.
Шундай ҳаракат қайта содир этилса, шунингдек, баданга ўртача оғир ёки оғир шикаст етказилишига сабаб бўлса, 300 соатгача мажбурий жамоат ишлари ёки 2 йилгача ахлоқ тузатиш ишлари ёхуд 1 йилгача озодликни чеклаш ёки 1 йилгача озодликдан маҳрум қилиш билан жазоланади.
Ўша ҳаракат одам ўлишига сабаб бўлса, уч йилгача ахлоқ тузатиш ишлари ёки икки йилдан беш йилгача озодликни чеклаш ёхуд беш йилгача озодликдан маҳрум қилиш билан жазоланади.
Ўша ҳаракат одамлар ўлимига, ҳалокатга ёки бошқа оғир оқибатларга сабаб бўлганда, 5 йилдан 10 йилгача озодликдан маҳрум қилиш билан жазоланади.
