Hibsga olingan bloger Abduqodir Mo‘minov, Turkiyada ketgan o‘zbekistonlik FVV xodimlari, Markaziy va Sharqiy harbiy okrug qo‘shinlarining yangi qo‘mondonlari, gullarga to‘layotgan O‘zbekistondagi Turkiya elchixonasi, metro qurilishi bilan tanishgan Shavkat Mirziyoyev va boshqalar — «Gazeta.uz»ning kun dayjestida.
Parlament komissiyasi Polat Shamshetovning kameradoshlariga tayanib, uning ko‘p tamaki chekkani tufayli nafas olishi og‘irroq bo‘lib qolganini ma’lum qildi. O‘sha kuni marhum ko‘p bezovtalangan, to‘satdan ularning ko‘z o‘ngida hushini yo‘qotgan.
Toshkentdagi «Texnopark» majmuasida zilziladan jabr ko‘rgan Turkiya aholisiga insonparvarlik yordami yig‘ilmoqda. Bu yerga issiq kiyim-kechak, oziq-ovqat, birlamchi ehtiyoj buyumlari, poverbanklar, tok generatorlari keltirilmoqda. Xohlovchilar juma kuni kechqurungacha yordam berishlari mumkin.
Turkiyaning Xatay va Malatya shaharlarida vayronalar ostidan o‘zbekistonlik bir ayol va bir erkak qutqarib olindi. Avvalroq Qahramonmarashda vayronalar ostidan o‘zbekistonlik topilgani haqida xabar berilgandi. Zilzila qurbonlari soni esa 8500 dan oshdi.
O‘zbekiston prezidenti Toshkentda chiqindilarni qayta ishlash hajmini kamida 50 foizga oshirish bo‘yicha topshiriq berdi. Hozirda bu ko‘rsatkich 18 foizni tashkil etadi.
O‘zbekiston prezidenti 1 aprelgacha Toshkentga 1000 ta avtobus olib kelinishini ma’lum qildi (avvalroq 1 martgacha ekani aytilgandi). Shuningdek, joriy yilda 25 ta ko‘chada jamoat transporti uchun ajratilgan yo‘laklar, 20 ta ko‘chada pullik to‘xtash joylari paydo bo‘ladi.
Shavkat Mirziyoyev poytaxt bosh reja tasdiqlanmaguncha yangi qurilishlarga moratoriy e’lon qilinishini aytdi. Bundan tashqari, 2023 yilda Toshkent shahrining yashillik darajasini 28 foizga yetkazish vazifasi qo‘yildi.
Bloger Abduqodir Mo‘minovga nisbatan firibgarlik va tovlamachilik moddalari bilan jinoyat ishi qo‘zg‘atildi. IIV ma’lumotida uning bir shaxsdan 3800 dollar olgani, boshqa bir shaxsdan esa 70 000 dollar so‘ragani aytilmoqda. Bloger hibsga olindi.
Tarmoqlarda «Toshkent otchopari» AJga tegishli otxonada hayvonlar ochlikdan o‘layotgani haqida xabarlar tarqaldi. Veterinariya qo‘mitasi 2 bosh ot noto‘g‘ri oziqlantirish oqibatida halok bo‘lganini ma’lum qildi. Holat bo‘yicha tergov oldidan tekshiruv tayinlandi.
O‘zbekiston aholisi Turkiyada sodir bo‘lgan yer silkinishlari ortidan halok bo‘lganlarning yaqinlari va qardosh mamlakatga hamdardlik bildirish maqsadida Toshkent shahridagi elchixona oldiga gullar olib bormoqda.
Shavkat Mirziyoyev Toshkent metropolitenidagi qurilish ishlari bilan tanishdi. Quruvchilar dahasidan Qipchoq bekatigacha bo‘lgan qariyb 4 kilometrlik metro yo‘li yaqin oylarda ishga tushadi. Qo‘yliq va Sergeli orasidagi qatnov vaqti 15 daqiqani tashkil etadi. Shuningdek, transport oqimi 12 foizga kamayishi kutilmoqda.
Ellikqal’a tumanidagi xonadonda gaz portladi. Oqibatda bir ayol vafot etdi. Voqea bo‘yicha o‘rganish ishlari boshlandi.
Qahramanmarash viloyatida zilzila oqibatida bedarak yo‘qolgan O‘zbekiston fuqarosi vayronalar ostidan olib chiqildi. U shifoxonaga joylashtirilgan va birinchi yordam ko‘rsatilmoqda.
Samarqandda fuqaroni 15 ming dollar evaziga Meksika orqali AQShga jo‘natmoqchi bo‘lgan shaxs ushlandi. U puldan uch ming dollarini olayotgan paytda DXX va IIB xodimlari tomonidan qo‘lga olindi.
Qurilish vazirligi uylarning zilzilaga bardoshliligiga kim kafolat berishi haqida ma’lumot berdi. Ishlarning sifatiga kafolat berish va ular lozim darajada bajarilmagan taqdirda, javobgar etib pudratchi belgilangan.
2023/2024 o‘quv yilidan boshlab professional va oliy ta’lim tizimida «Inson huquqlari», «Ayollar huquqlari» va «Bola huquqlari» bo‘yicha o‘quv va maxsus kurslar joriy etiladi.
Turkiyaning so‘nggi 100 yillik tarixidagi eng kuchli zilzila bu mamlakatda yashovchi o‘zbekistonliklar hayotiga ham ta’sir qildi. “Uyim ko‘z oldimda quladi”, — deydi ulardan biri. “Uyda ovqatlanib, mashinada tunayapmiz”, — deydi boshqa bir vatandosh. “Gazeta.uz” Turkiyadagi o‘zbekistonliklar bilan suhbatlashdi.
Turkiyaga ketgan o‘zbekistonlik FVV xodimlari tonggacha vayronalar ostidan 21 kishini chiqarib oldi. Ularning 12 nafari vafot etgan. Qolganlari turli tan jarohatlari olgan.
Daraxtlarga osilgan yoki yerda yotgan elektr kabellarini ko‘rgan Toshkent shahri aholisidan Xalq nazorati portali orqali xabar berishlari so‘ralmoqda. Hokimlik anomal sovuq paytida tezroq elektr uzatib berish uchun simlar shu tarzda o‘tkazilganini ma’lum qildi.
Malaysia Airlines aviakompaniyasi Kuala-Lumpur-Toshkent-Kuala-Lumpur yo‘nalishi bo‘yicha parvozlarni tiklamoqda. Reyslar har o‘n kunda bir marta amalga oshirilishi rejalashtirilgan.
Qo‘shimcha imkoniyatlarga ega bulish uchun saytda ro‘yxatdan o‘ting