Автомобиль йўллари қўмитаси раиси Жамшид Турсунов «Газета.uz» мухбирининг Бектемирдан Чорвоққа борувчи йўлнинг бир қисми реконструкция қилиб, пулли йўлга айлантириши ҳақидаги саволига жавоб берди. Савол жавоблар ОИИБнинг тўққизинчи йиллик йиғилиши доирасида сессияда бўлиб ўтди.
Мазкур режага муносабат билдирар экан, Жамшид Турсунов пулли йўл қуриш учун, албатта, унга муқобил равишда бепул йўлни истеъмолчига таъминлаб бериш кераклигини таъкидлади.
«А нуқтадан Б нуқтага бориладиган йўлда муқобиллик таъминланиши шарт, бу менинг шахсий фикрим. Бугунги кунда Тошкент-Бўстонлиқ йўлда муқобиллик асосида бориладиган бир эмас, иккита йўл бор», — деди у.
Қўмита раисининг фикрича, бу йўлнинг узил-кесил пулли қилиш ҳақида айтилишига сал бошқачароқ қараш лозим бўлади.
«Тошкентдан Бўстонлиққа ўзингиз ҳам бориб кўрган бўлсангиз керак, қанчалик тирбанд шу йўл? Туркиялик ҳамкорларимиз билан шу йўлни тижорат мақсадида реконструкция қилиш масаласи қўйилганди. Ҳамкорларимиз шу йўлни пулли йўлга айлантириш бўйича таклифини беряпти», — деди Турсунов.
У, шунингдек, Хитойнинг CITIC компанияси Тошкентдан Бўстонлиққа янги йўналишда, Чирчиқ шаҳрини айланиб ўтиб борувчи йўл лойиҳаси устида ишлаётганини қўшимча қилди.
«Бундан ташқари, Хитойнинг CITIC компанияси шу Тошкент-Бўстонлиқ йўлини янги йўналишда, Чирчиқ шаҳрини айланиб ўтиш лойиҳасини тақдим этган ва бу лойиҳанинг техник иқтисодий асослари, ҳозир айтилаётган лойиҳадан анча олдин ишлаб чиқилиб, экспертизаси олиб борилмоқда. Ва шу бўйича ҳам ҳали эълон қилинмаган 2−3 та лойиҳаларимиз бор», — деди қўмита раиси.
Жамшид Турсунов ОАВдан буни тўғри талқин қилишни ҳам сўради ва хавотирга ўрин йўқ, дея таъкидлади.
«Оммавий ахборот воситаларидан буни тўғри талқин қилишни илтимос қилган бўлардим. Сабаби, ҳали йўқ нарсага бюджетдан қилинган йўлни пулли қилар экан, деган фикрни уйғотиш нотўғри бўлади. Ундай бўлмайди, хавотирга ўрин йўқ», — деди у.
Эслатиб ўтамиз, аввалроқ Иқтисодиёт ва молия вазирлиги Туркиянинг Onur Group компанияси билан давлат-хусусий шериклик асосида 4P12 Бектемир- Чирчиқ — Ғазалкент- Чорбоғ автомобиль йўлининг 6−77 км қисмини асфальт-бетон қоплама билан реконструкция қилиш лойиҳаси юзасидан музокаралар олиб борганини маълум қилганди. Мазкур йўлни пулли йўлга ўтказиш режалаштирилмоқда.
Лойиҳа 18 сентябрь куни Onur Group компанияси экспертлари, Иқтисодиёт ва молия вазирлиги ҳамда Автомобиль йўллари қўмитаси ходимлари иштирокида жойига чиққан ҳолда ўрганилган. Учрашув якунида томонлар «лойиҳани амалга ошириш бўйича тегишли ҳужжатларни тайёрлаш ва уни амалга ошириш» бўйича кейинги қадамларни белгилаб олиш юзасидан келишувга эришган.
Автомобиль йўллари қўмитаси матбуот хизматининг аниқлик киритишича, транспорт вазирлиги ушбу пулли йўл учун ҳали тендер ўтказмаган. Вазирлик ушбу компаниянинг таклифлари кўриб чиқилганини ва лойиҳанинг техник-иқтисодий асослари ҳали ишлаб чиқилмаганини маълум қилди. Шундан сўнг, тендер ўтказилади ва лойиҳа пудратчиси аниқланади, дея билдирди вазирлик.
Молиячи Отабек Бакиров Чорвоққа элтувчи давлат қурган йўлнинг пулли йўлга айланиши пулли йўл моҳиятига зид экани ҳақида ёзди.
«Мазкур йўлни давлат қурган, давлат йўл ташкилотлари балансида. Ўзбекистонда пулли йўллар тўғрисида қонун мавжуд эмас (ярим йил аввал лойиҳа ишлаб чиқилган). Лекин халқаро амалиётда ҳам, таклиф этилаётган қонун лойиҳасида ҳам давлат қурган ва умумфойдаланувда бўлган йўлни қайсидир «инвестор»га топшириб, пулли йўлга айлантириш деган лазейка йўқ», — дея таъкидлади у.
Отабек Бакиров қонун лойиҳасида ҳам бу ҳақда гап боришига эътибор қаратди. Унда шундай дейилади:
«Пулли автомобиль йўлини режалаштириш, лойиҳалаш, қуриш ва эксплуатация қилиш мавжуд автомобиль йўлларида атроф-муҳит ва жамоат хавфсизлигини ҳисобга олган ҳолда йўллардаги тирбандликни камайтириш, ўтказувчанлик қобилиятини ошириш ҳамда юқори сифатли хизматлар кўрсатиш, шунингдек, транспорт соҳасига оид ахборот тизимлари билан интеграцияни таъминлаш имконини берадиган муқобил автомобиль тармоғини яратиш мақсадида амалга оширилади».
«Ҳали шунча йиллардан бери ваъда қилинаётган биронта пулли йўл қурилишини қойилмақом қилмай туриб, борларини пулли йўлга айлантиришга ўтиб кетманглар, барака топгурлар», — дейди Отабек Бакиров.
