Ўзбекистон Баскетбол федерациясида 489 миллион сўм талон-торож қилингани аниқланди, дея хабар бермоқда Бош прокуратура матбуот хизмати.
Қайд этилишича, федерация ишлар бошқарувчиси С.И. ижрочи директори Ю.С. билан ўзининг онаси ва укаси номига S.A.G. компаниясини ташкил қилган. Спортчилар соғлиғини мониторинг қилишга мўлжалланган, аслида етказиб берилмаган 2 дона махсус ускуна учун федерациядан 197 млн сўм маблағни жамият ҳисобига ўтказиб, талон-торож қилган.
Федерациянинг биринчи вице-президенти Х.Г. эса ташкилотга тегишли корпоратив пластик картадан ноқонуний равишда шахсий эҳтиёжлари учун 162 млн сўм маблағни ечиб олиб, ўзлаштирган.
Бундан ташқари, юқоридаги мансабдорлар федерацияга гуёки ҳомийларни жалб қилиш хизматларини кўрсатиш ҳақида сохта шартнома расмийлаштириб, федерациянинг 130 млн сўм маблағини ўз эҳтиёжлари учун сарфлаб юборган.
Аниқланган ҳолатлар юзасидан жиноят иши қўзғатилиб, тергов ҳаракатлари ўтказилган ва суд ҳукми билан айбдорларга тегишли жазо чоралари қўлланилган, дейилади хабарда.
Аввалроқ Сузиш федерацияси мансабдор шахслари томонидан 2 млрд сўмдан ортиқ маблағлар талон-торож қилингани маълум бўлганди.
