Ўзбекистонда Хитой тажрибасига таяниб, ипак олишнинг муқобил усуллари йўлга қўйилади. Бу бўйича 10 май куни Шавкат Мирзиёев чарм ва ипак саноати мавзусига бағишланган видеоселектор йиғилишида Ўсимликлар карантини ва ҳимояси агентлигига топшириқ берди.
Президентнинг сўзларига кўра, Ўзбекистонда пилланинг харид нархи паст, шу сабабли пиллакорларда манфаатдорлик кам. Шунинг учун пилла харид нархини 25 фоизга ошириш бўйича фармон чиқарилди. Унга кўра, пиллакорлар даромад ва ижтимоий солиқлардан озод қилинди, тутзорлар учун ер солиғининг 10 фоизи тўланади.
Бундан ташқари, Хитойда канакунжут қуртини парваришлаб, ипак олиш кенг йўлга қўйилган. Давлат раҳбари бу йўналишни Ўзбекистоннинг иқлим шароитидан келиб чиқиб татбиқ қилиш мақсадга мувофиқлигини айтди. Унинг топшириғига кўра, Ўсимликлар карантини ва ҳимояси агентлиги канакунжут ўсимлиги ва қурти уруғларини олиб келиб, Ипакчилик институтида синов ишларини бошлайди.
Шунингдек, ҳокимлар ва соҳа мутасаддиларига пилла мавсумини сифатли ташкил этиб, ҳосилни йўқотишсиз йиғиб олинишни таъминлаш топширилди. Қолаверса, янги тутзорлар ташкил қилса бўладиган 105 минг гектар ерни ажратиш бўйича топшириқ берилди. Бу ерлар лотларга бўлиниб, аукционда берилади, унинг бошланғич нархи 10 фоиз этиб белгиланади.
