Xitoy Fanlar Akademiyasi, Anhui Zhifei Longcom Biopharmaceutical Co. kompaniyasi hamda O‘zbekiston olimlari jamoasi hammuallifligida yaratilgan koronavirusga qarshi ZF-UZ-VAC2001 rekombinanant vaksinasining III faza sinovlari natijalarining dastlabki statistik tahlillari yakunlandi. Bu haqda Innovatsion rivojlanish vazirligi xabar berdi.
Xitoy-o‘zbek vaksinasining 3 faza klinik sinovlari natijalari 27 avgust kuni Xitoy fond bozorida e’lon qilindi.
«Shtammlar genetikasi bo‘yicha tadqiqotlar, ZF-UZ-VAC2001 vaksinasi barcha shtammlar uchun umumiy 81,76%, Alpha („britancha“) shtammiga qarshi 92,93%, Delta („hindcha“) shtammiga qarshi 77,54% samaradorligini namoyish etdi», — deyiladi xabarda.
Qayd etilishicha, mazkur tadqiqot shuningdek vaksinaga bo‘lgan inson organizmining reaksiyasi vaksina va platsebo olganlarda farq qilmaganini ko‘rsatgan. «Shunday qilib, klinik tadqiqotlar natijasi Xitoy-O‘zbekiston hammuallifligida yaratilgan vaksina aholiga koronavirus yuqishining oldini olish va xavfsizlik jihatdan samarali ekanini tasdiqladi», — deyiladi vazirlik bayonotida.
Vaksinaning III faza xalqaro ko‘pmarkazli klinik tadqiqotlari 2020 yilning 10 dekabridan boshlangan bo‘lib, 18 yoshdan katta bo‘lgan jami 29 000 nafar kishini qamrab oldi. Mazkur tadqiqotlar Xitoyning Xunan provinsiyasida, shuningdek O‘zbekiston, Indoneziya, Pokiston va Ekvador davlatlarida o‘tkazildi. Ko‘ngillilar vaksina bilan 0,1,2 oy oralig‘ida 3 dozada emlandi.
30 iyun sanasiga kelib jami 28 500 nafar ko‘ngilli ro‘yxatdan o‘tkazilgan bo‘lib, ulardan 14 249 nafari vaksina va 14 251 nafari platsebo olganlgi qayd etilgan. Mazkur ko‘ngillilardan 647 nafarida kasallik aniqlandi, ulardan 221 nafarida kasallik 3 ta doza vaksina olgandan so‘ng 7 kundan keyin aniqlandi. JSST protokoliga ko‘ra kamida 156 ta holatda kasallik aniqlansagina tadqiqot natijalari ochilishi mumkin.
Dastlabki statistik tahlil to‘liq vaksinatsiyadan 7 kun keyin kasallanganlarning 35 nafari vaksina bilan, 186 nafari platsebo bilan emlanganini ko‘rsatdi. Bu vaksinaning 81,76% samarali ekanini anglatadi. JSST talablariga ko‘ra vaksina kamida 70 foiz samara berishi lozim. Shuningdek, ZF-UZ-VAC2001 vaksinasi bilan emlanganlar orasida kasallikning og‘ir shakli bilan og‘riganlar yoki o‘lim holatlari qayd etilmadi.
«ZF-UZ-VAC2001 vaksinasining O‘zbekistondagi klinik sinovlarига keladigan bo‘lsak, klinik tadqiqotlar Zhifei Longcom Biopharmaceutical Co.Ltd kompaniyasining 8 nafar mutaxassisi, Innovatsion rivojlanish vazirligi huzuridagi Ilg‘or texnologiyalar markazining 30 nafar olimi, Sog‘liqni saqlash vazirligi huzuridagi Virusologiya ilmiy-tadqiqot instituti va boshqa tibbiyot muassasalarining 112 nafar tibbiyot xodimlari tomonidan o‘tkazildi», — deyiladi xabarda.
Ma’lum qilinishicha, klinik tadqiqotlarda O‘zbekistondan jami 6966 nafar ko‘ngilli ishtirok etdi, ulardan 214 nafari 60 yoshdan katta kishilardir. Tadqiqotlar davomida har bir ko‘ngilli ishtirokchi 28 kun oralig‘i bilan 3 ta dozada «vaksina/platsebo» sxemasida emlandi. «Ulardan 13 kishida o‘rta darajadagi nojo‘ya ta’sir aniqlangan bo‘lib, bu 1 foizdan kam ko‘rsatkichdir. Alohida ajratilgan guruhlarda 95 foiz holatlarda yetarli darajada antitanalar ishlab chiqarilgani aniqlandi.
«Joriy yilning 27 mart kunidan ko‘ngillilar orasida COVID-19 kasalligiga chalinganlar aniqlana boshladi. 232 nafar ko‘ngillida PZR test musbat natija ko‘rsatgan bo‘lsa, ulardan 52 nafar kishi kasallikning o‘rta shakli bilan og‘ridi. Musbat PZR testlar namunalari britancha shtamm mavjudligiga tekshirildi», — deyiladi bayonotda.
Ma’lumot uchun, Pfizer vaksinasining samaradorligi 85%, AstraZeneca 68% ekani, Moderna vaksinasi esa «birlamchi» shtamm (Uxancha) uchun yuqori samaradorlikni ko‘rsatib (94%), Delta shtamm uchun 76% gacha pastlagani ilmiy adabiyotlarda qayd etilgan.
Avvalroq, «Gazeta.uz» nima uchun kovidga qarshi ommaviy emlash klinik sinovlar yakuniga yetmasdan boshlangani haqidagi maqolani e’lon qilgandi.
