Senatning Axborot siyosati va davlat organlarida ochiqlikni ta’minlash masalalari qo‘mitasi raisi o‘rinbosari Farhod Boqiyev 17 dekabr kuni Axborot va ommaviy kommunikatsiyalar agentligida bo‘lib o‘tgan matbuot anjumanida sud qarorisiz ijtimoiy tarmoqlarni bloklash bo‘yicha savollarga javob berdi (video).
Jurnalistlar, agar xizmatga O‘zbekistondan kirish mavjud bo‘lmasa, Senat raisi Tanzila Narbayevov nomidan tvitlar qanday chop etilishini so‘rashdi. Parlament yuqori palatasi rahbaridan tashqari, Twitter ijtimoiy tarmog‘ida prezident matbuot xizmati, mamlakat hukumati va boshqa ko‘plab davlat idoralari ham xabarlar e’lon qiladi.
Farhod Boqiyev aprel oyida kuchga kirgan «Shaxsiy ma’lumotlar to‘g‘risida»gi qonunga o‘zgartirishlarni ma’qullagan Senat tanqidini tilga oldi. Qonunga ko‘ra, O‘zbekiston fuqarolarining shaxsiy ma’lumotlarini qayta ishlash jarayonida tizimlashtirish va saqlash jisman O‘zbekistonda joylashgan texnik vositalarda amalga oshirilishi kerak.
«Men bir vaziyatga alohida e’tibor qaratmoqchiman. Agar qonunga diqqat bilan qarasangiz, „O‘zbekiston Respublikasi fuqarolarining shaxsiy ma’lumotlarini qayta ishlashning alohida shartlari“ [qo‘shilgan] 27−1-moddada blokirovka qilish haqida gap yo‘q», — dedi u.
Senat rahbari Twitter orqali xabarlar joylashtirishda qanday VPN xizmatidan foydalanishi haqida so‘ralganda, senator bu borada aniq ma’lumotga ega emasligini aytdi.
«Xorijiy hamkorlar, xorijiy delegatsiyalar, xorijiy parlamentlar bilan bog‘liq ish jarayonlari mavjud», — dedi u.
Eslatib o‘tamiz, iyul oyida «O‘zkomnazorat» davlat inspeksiyasi «Shaxsiy ma’lumotlar to‘g‘risida»gi qonunni buzgani uchun Twitter, TikTok, «VKontakte», WeChat va Skype messenjeriga kirishni cheklagan edi. Noyabr oyi boshida Telegram, Facebook, «Odnoklassniki», YouTube va boshqa saytlar ham qoidabuzarlar reyestriga kiritildi. Bu jamoatchilikning noroziligiga sabab bo‘ldi va bir necha soatdan keyin kirish tiklandi. «O‘zkomnazorat» rahbari lavozimidan ozod etildi, biroz vaqt o‘tgach, AKT vazirligi rahbari va bosh vazirning IT bo‘yicha maslahatchisi o‘z lavozimlarini tark etdi. Bugungi kunga qadar TikTok, Twitter, «VKontakte», WeChat va Skype`ga kirish cheklanganligicha qolmoqda.
Prezident Shavkat Mirziyoyev 29 oktabr kuni Jinoyat va Ma’muriy javobgarlik to‘g‘risidagi kodekslarga shaxsiy ma’lumotlar to‘g‘risidagi qonun hujjatlarini buzganlik uchun jazoni kuchaytirish to‘g‘risidagi qonunni imzoladi. Hujjat 2022 yil 30 yanvardan kuchga kiradi.
