19-noyabr kuni 150 mingdan ziyod o‘zbekistonliklar Yangi Nafas ommaviy yugurish musobaqasida ishtirok etdi. O‘zbekiston davlat bayrog‘i qabul qilinganining 32 yilligi munosabati bilan mamlakatning 16 ta shahrida Markaziy Osiyodagi keng ko‘lamli sport tadbirlaridan biri tashkil etildi.
Bayroq kuniga bag‘ishlangan Yangi Nafas vatanparvarlik ruhidagi ommaviy yugurish musobaqasi Andijon, Namangan, Farg‘ona, Nurafshon, Guliston, Jizzax, Samarqand, Termiz, Navoiy, Buxoro, Qorovulbozor, Qarshi, G‘uzor, Xiva, Nukus va Toshkent shaharlarining aholisini birlashtirdi.
Poytaxtda ushbu sport tadbiri shaharning markazi — Humo Arena sport majmuasining maydonida bo‘lib o‘tdi, unda 8 mingga yaqin ishtirokchi 3 va 10 km masofalarga yugurish bo‘yicha bellashish uchun yig‘ildi. Boshqa shaharlarda Yangi Nafas yugurish musobaqasi umumiy 3 km masofada tashkil etildi.
Musobaqaning ochilishida Yoshlar siyosati va sport vaziri Adham Ikromov va Oliy ta’lim, fan va innovatsiyalar vaziri o‘rinbosari Sarvarxon Buzrukxanov qutlov nutqi bilan so‘zga chiqdilar.
“Davlat bayrog‘i qabul qilingan kunni nishonlash — bu biz nafaqat muhim davlat sanasiga hurmat bildiradigan kun, balki mamlakatimiz va yurtdoshlarimiz tomonidan joriy yilda erishilgan muayyan natijalar va yutuqlarga nazar tashlash imkoniyatidir. Bugungi kunda professional sport jadal suratlarda rivojlanib borayotgani sportchilarimizning yirik xalqaro musobaqalarda, shu jumladan, 2022-yilda Xanchjou shahrida bo‘lib o‘tgan Osiyo o‘yinlarida erishgan yuksak natijalaridan dalolatdir. Sport marafonlari, ommaviy yugurish musobaqalari, havaskor musobaqalarining tashkilotchilari tufayli aholining ommaviy sportga qiziqishi tobora ortib bormoqda. Bunday tadbirlar yosh avlodga rag‘bat sifatida xizmat qilib, yurtimizning kattayu kichik shaharlarida fuqarolarni birdamlik, do‘stlik va vatanparvarlik g‘oyalari yo‘lida jipslashtiradi”, — deb ta’kidladi O‘zbekiston Yengil atletika federatsiyasi raisining o‘rinbosari Andrey Abduvaliyev.
O‘zbekiston qurolli kuchlari akademiyasining kursantlari ishtirokida ommaviy yugurish musobaqasining start va finish maydoniga davlat bayrog‘ining tantanali ravishda ko‘tarib olib chiqilishi umumxalq bayramiga o‘zgacha ruh baxsh etdi. Boshqa shaharlarda ham bayroqlar bilan turli yurishlar va mavzuga doir fleshmoblar tashkil etildi. Tadbirning Sport TV telekanalida viloyatlar va Qoraqalpog‘istondan uzatishlar orqali jonli efiri tashkil etildi.
1991-yil 18-noyabrda O‘zbekiston milliy bayrog‘ining maqomi belgilandi va jahon xaritasida yangi mustaqil davlat ramzi sifatida mustahkamlandi. Bugungi kunda mustaqil O‘zbekiston bayrog‘i ostida ilm-fan, axborot texnologiyalari, madaniyat, san’at, katta va ommaviy sport kabi turli jabhalarda yuksak marralarni qo‘lga kiritayotgan, hamda mamlakatning taraqqiyoti va farovonligiga salmoqli hissa qo‘shayotgan butun bir avlod voyaga yetdi.
Mustaqil O‘zbekistonning shunday vakillaridan biri 10 000 m va yarim marafon masofasida O‘zbekistonning ikkita milliy rekordining muallifi Sitora Hamidovadir. U Termizdagi Yangi Nafas ommaviy yugurish musobaqasiga qo‘shildi.
“Bundan bir hafta oldin mintaqamizning eng kuchli sportchilari o‘rtasida Dubayda bo‘lib o‘tgan birinchi Osiyo yarim marafonida qatnashish sharafiga muyassar bo‘ldim va u yerda ikkinchi o‘rinni egallab, yurtim bayrog‘ini hayajon bilan baland ko‘tardim. Bugun esa men uchun ushbu muhim bayram — bayroq kunini o‘z ona shahrimda, oilam va do‘stlarim davrasida bayramona sport muhitida baham ko‘rmoqdaman. Mamlakatim menga hayotiy faoliyatim — yengil atletikaga yo‘lni ochdi va minglab boshqa yosh va iste’dodli yoshlarga yo‘l ochmoqda”, — dedi sportchi.
Ta’kidlash joizki, keng ko‘lamli sport tadbirini tashkil etish uchun O‘zbekiston bo‘ylab 450 dan ortiq volontyorlar jalb etilgan. Tashkilotchilar tomonidan hakamlar va murabbiylar uchun o‘quv mashg‘ulotlari o‘tkazildi, Qarshi, Namangan va Nukus shaharlarida matbuot anjumanlari tashkil etildi. Yosh avlod tarbiyasi Yangi Nafas harakatining muhim yo‘nalishidir. Bayramda Oliy ta’lim, fan va innovatsiyalar vazirligi ko‘magida O‘zbekistonning 211 ta oliy ta’lim muassasalaridan 50 mingdan ortiq talaba faol ishtirok etdi.
Bayroq kunini nishonlashga qo‘shni davlatlardan ham yuguruvchilar qo‘shildi. O‘zbekiston yengil atletika federatsiyasining tashabbusi bilan 2023-yilda Yangi Nafas ommaviy yugurish musobaqasi xalqaro maqomga ega bo‘ldi va World Athletics yengil atletika federatsiyalari Xalqaro assotsiatsiyasining amaldagi qoidalariga muvofiq o‘tkazilmoqda. Buning natijasida sport musobaqasiga Qozog‘iston, Tojikiston va Qirg‘izistondan sportchilar va yugurish klublari a’zolari taklif qilinmoqda.
Toshkentda 3 km masofada g‘oliblikni ayollar orasida Anastasiya Silchenkova, erkaklar orasida Xasan Mirsoatov qo‘lga kiritdi. 10 km masofaga yugurishda esa — Marina Xmelevskaya va Nodirbek Mutalipov g‘alabaga erishdi.
Quyidagi tashkilotlar vatanparvarlik ommaviy yugurish musobaqasining tashkilotchilari bo‘lishdi:
- oliy ta’lim,fan va innovatsiyalar vazirligi;
- sog‘liqni saqlash vazirligi;
- Asaka bank ATB;
- ichki ishlar vazirligi;
- favqulodda vaziyatlar vazirligi;
- maktabgacha ta’lim va maktab ta’limi vazirligi;
- yoshlar siyosati va sport vazirligi;
- “O‘zbekneftgaz” AJ;
- O‘zbekiston yengil atletika federatsiyasi.
Reklama huquqlari asosida.
