2−4-may kunlari Toshkent shahridagi G‘alaba bog‘ida Mudofaa vazirligi va Mudofaa sanoati agentligi hamkorligida ilk bor mudofaa sohasidagi innovatsion texnologiyalar festivali bo‘lib o‘tdi.
Unda 20 ga yaqin yirik ishlab chiqarish korxonasi, 50 ta tashkilot, 30 nafardan ortiq jismoniy shaxs va ixtirochi ishtirok etdi. Ular zamonaviy texnologiyalar, metallurgiya, kimyo va to‘qimachilik sanoati sohasida erishilgan yutuqlar, shuningdek, Qurolli kuchlar uchun zarur bo‘lgan ikkilamchi mahsulotlarni namoyish etdi.
Shuningdek, festival doirasida “Robototexnika”, “Kibersport”, “Dron poygalari”, “3D modellashtirish”, “Dron dizayni”, “Dasturlash” kabi yetti yo‘nalish bo‘yicha tanlovlar o‘tkazildi.
Tanlov davomida texnika, aloqa, axborot-kommunikatsiya texnologiyalari, o‘quv-texnik vositalar, dasturiy ta’minot, aviatsiya, uchuvchisiz uchish tizimlari, robototexnika vositalari, o‘quv majmualari, asboblarni himoya qilish, kimyoviy texnologiyalar va boshqa sohalarda kelgusida foydalanish uchun raqobatbardosh ishlab chiqarish loyihalari va mahsulot prototiplari tanlab olindi.
Festival tanlov va festival davomida saralangan iqtidorli yoshlar va fuqarolarga o‘z mahsulotlarini ishlab chiqarishni yo‘lga qo‘yish, ularni mudofaa sanoati korxonalari va zavodlarida ish bilan ta’minlash imkonini berdi, deya ta’kidladi Mudofaa vazirligi.
Xabarda 2023-yilda Mudofaa sanoati agentligi qayta tashkil etilganidan buyon yangi harbiy zavod va korxonalar qurilgani, mavjudlari esa to‘liq modernizatsiya qilinib, zamonaviy texnologiya va uskunalar bilan jihozlangani qayd etiladi.
Harbiy-texnika sohasida 40 dan ortiq davlat bilan hamkorlik yo‘lga qo‘yilgan, 30 ga yaqin yetakchi xorijiy kompaniyalar bilan shartnomalar tuzilgan, 38 ta mahalliy korxona bilan aloqalar o‘rnatilgan. O‘zbekistonning harbiy zavod va korxonalarida ishlab chiqarilayotgan mahsulot turlari 155 taga, xizmat ko‘rsatish esa 2,5 barobarga oshgan.
Bugungi kunda mamlakat harbiy zavod va korxonalarida jangovar texnika va yengil zirhli mashinalar, dronlar, optik asboblar va antidronlar, zirhli dubulg‘alar, kimyoviy va zarbalardan himoya qiluvchi vositalar, shuningdek, ikkilamchi mahsulotlar ishlab chiqarish yo‘lga qo‘yilgan.
Foto
