Vazirlar Mahkamasining tegishli qarori bilan, Shoxrux Gulamov hamda Akram Aliyev investitsiyalar, sanoat va savdo vaziriga o‘rinbosar vazifasini bajaruvchilar etib tayinlandi. Bu haqda bosh vazir matbuot kotibi Behzod Hidoyatov ma’lum qildi.
Shoxrux Xasanovich Gulamov (1990-yilda tug‘ilgan) tayinlovga qadar mazkur vazirlikning xalqaro hamkorlik departamenti boshlig‘i lavozimida ishlab kelgan. U, shuningdek, MDH Iqtisodiy kengashi huzuridagi Iqtisodiy masalalar bo‘yicha komissiyada O‘zbekistonning vakolatli vakili sifatida ham ishlagan.
Akram Zairovich Aliyev (1991-yilda tug‘ilgan) esa vazirlik departamenti direktori lavozimida ishlagan.
Vazirlar Mahkamasi matbuot xizmati “Gazeta.uz”ga oydinlik kiritishicha, ular vakant turgan vazir o‘rinbosarlari lavozimlariga tayinlangan.
Odatda vazir o‘rinbosarlari prezident tomonidan tayinlanadi, ammo yoshroq amaldorlarga vaqtincha bajaruvchi statuslari berilmoqda, shuning uchun qaror bosh vazir tomonidan qabul qilingan.
