2-iyul kuni O‘zbekiston investitsiyalar, sanoat va savdo vaziri Laziz Kudratov va Yaponiya elchisi Xatori Takashi beg‘araz yordam doirasida amalga oshirilayotgan 1 mlrd iyenalik (6,262 mln dollar) “Iqtisodiy va ijtimoiy rivojlanish dasturi” bo‘yicha almashinuv notalarini imzoladi. Bu haqda vazirlik matbuot xizmati xabar berdi.
O‘zbekistonga kompyuter tomografiyasi skanerlari, ultratovush, rentgen apparatlari bilan jihozlangan qo‘shimcha 4 ta tibbiy mobil konteyner yetkaziladi. Bu bilan respublika bo‘ylab samarali tibbiy yordam ko‘rsatish imkoniyatlari yaxshilanishi ta’kidlandi.
Kompyuter tomografiyasi skanerlari qator kasalliklarni aniqlashda muhim hisoblanadi. Mobil tibbiy konteyner har qanday joyda, jumladan, favqulodda vaziyatlarda ham xizmat ko‘rsatishi mumkin.
Foto: Yaponiya elchixonasi
“Ushbu dastur chekka hududlar aholisining tibbiy xizmatlardan foydalanishini osonlashtirishi, sog‘liqni saqlash va tibbiy xizmat ko‘rsatish tizimini mustahkamlashi, shuningdek, O‘zbekistonning iqtisodiy va ijtimoiy rivojlanishiga hissa qo‘shishi kutilmoqda”, — deya qayd etdi Yaponiya elchixonasi matbuot xizmati “Gazeta.uz”.
2022-yilda Yaponiya O‘zbekistonga tibbiy konteyner va tomografiya uchun skanerlar topshirgandi.
