Siyosat
Buxoro shahri sobiq hokimi viloyat ekoboshqarmasiga boshliq bo‘ldi
Jamol Nosirov Buxoro viloyati ekologiya, atrof muhitni muhofaza qilish va iqlim o‘zgarishi boshqarmasi boshlig‘i etib tayinlandi. Buxoro shahriga 3 yil hokimlik qilgan Nosirov may oyida sog‘lig‘i yomonlashgani uchun ishdan ketgandi.
Iqtisodiyot
BYD O‘zbekistonda elektromobillarning budjet modellarini ishlab chiqarishni rejalashtirmoqda
O‘zbekiston BYD bilan V, S va budjet avtomobillarini ishlab chiqarish bo‘yicha kelishuvga erishdi. Ularning namunalari xitoylik hamkorlar sinovidan o‘tkazish uchun laboratoriyaga topshirildi. Avvalroq zavod 3 ta yangi model: E2, Seagull va Yuan`ni ishlab chiqarishni rejalashtirayotgani xabar qilingandi.
Xitoy-Qirg‘iziston-O‘zbekiston temir yo‘li loyihasini amalga oshirish to‘g‘risida bitim tasdiqlandi
Xitoy hukumati, Qirg‘iziston Vazirlar Mahkamasi va O‘zbekiston hukumati o‘rtasida Xitoy-Qirg‘iziston-O‘zbekiston temir yo‘li loyihasini birgalikda amalga oshirishda hamkorlik qilish to‘g‘risidagi bitim tasdiqlandi. Transport vazirligi ushbu shartnomani amalga oshirish uchun mas’ul vakolatli organ etib belgilandi.
HET — biznes uchun elektr energiyasi bo‘yicha ikki baravar tariflarni qo‘llash haqida
O‘zbekistonda biznes va boshqa yuridik shaxslar ilgari elektr energiyasi uchun 1 kVt/soat 900 so‘m bo‘lgan tarifda belgilangan limitdan 10 foizga oshib ketsa, 960 so‘mdan to‘lardi. Endi ortiqcha hajmga 2 baravargacha bo‘lgan tarif (1800 so‘m) qo‘llanadi. HET yangi qoidalarni tushuntirdi.
Hisob palatasi budjetdan tashqari jamg‘armalar va tashqi qarz hisobidan qilingan xarajatlar auditini o‘tkazadi
Prezident budjet mablag‘larining sarflanishi ustidan nazoratni kuchaytirish bo‘yicha takliflar bilan tanishdi. Hisob palatasi budjetdan tashqari jamg‘armalar va tashqi qarz hisobidan qilingan xarajatlarni qamrab olish imkonini beruvchi konsolidatsiyalashgan budjet auditini o‘tkazishni taklif etmoqda.
Xitoyning Henan kompaniyasi O‘zbekistondagi ko‘mir konlarini rivojlantirishga 400 mln dollar investitsiya kiritmoqchi
Xitoyning Henan kompaniyasi O‘zbekistondagi ko‘mir konini o‘zlashtirish uchun 400 mln dollar sarflashni rejalashtirmoqda. Turkiyaning Bab Energy ve Petrol Urunleri A.S kompaniyasi esa Toshkent viloyatida boyitilgan kaolin ishlab chiqarish niyatida.
Jamiyat
Xususiy universitetlarga litsenziya berish to‘xtatilgan — O‘zbekiston oliy ta’lim vaziri
Oliy ta’lim, fan va innovatsiyalar vaziri Kongratbay Sharipov xususiy universitetlarga litsenziya berish to‘xtatilganini (so‘nggi bor 2023-yil oktabrda berilgan) aytib, buni ta’lim sifati va ishsizlik bilan bog‘ladi. Vazirlik bunday litsenziya berishni takomillashtirish bo‘yicha qaror loyihasini ishlab chiqmoqda.
Toshkentda yuqori tezlikdagi Spark 2 ta mashina bilan to‘qnashdi
Sergeli tumanida yuqori tezlikdagi Spark beton to‘siq ustidan uchib o‘tib, qarama-qarshi yo‘ldagi Honda va Spark bilan to‘qnashdi. Oqibatda 3 kishi jarohatlandi.
Toshkent viloyatida gaz ta’minoti bosh muhandisi pora olishda gumonlanmoqda
“O‘rta Chirchiq tumangaz” gaz ta’minoti bo‘limi bosh muhandisi 8,5 ming dollar pora olishda gumonlanib ushlandi. U tadbirkorga sexni gaz tarmog‘iga ulashga ruxsat berishini va elektron hisoblagich o‘rnatib berishini aytgan.
Turkiyadagi deport markazidan 34 nafar o‘zbekistonlik ayol ozod etilib, vatanga qaytarildi
Oila va xotin-qizlar qo‘mitasining Turkiyada qiyin vaziyatga tushib qolgan o‘zbekistonlik ayollar bilan uchrashuvlari davomida Silivri deport markazidan 34 nafar ayol ozod etilib, vatanga qaytarildi. Yana 3 nafari ozodlikka chiqarildi.
Bank hisob raqamlaridan 370 mlrd so‘m o‘g‘irlamoqchi bo‘lgan guruh qo‘lga olindi
To‘rt kishidan iborat guruh bank xodimidan dasturiy ta’minot va hisob raqamlariga kirish uchun kodlar sotib olib, 370 mlrd so‘m (29,3 mln dollardan ortiq) o‘g‘irlamoqchi bo‘ldi. Ular xorijdagi hisobraqamlarga o‘tkazish uchun 189 mlrd so‘mni konvertatsiya qilmoqchi bo‘lganida qo‘lga tushdi.
Senat elektr energiyasi bozoriga xususiy sarmoyani jalb qilish ko‘zda tutilgan qonunni ma’qulladi
O‘zbekiston elektr energiyasi bozoriga xususiy sarmoyani jalb qilish ko‘zda tutilgan qonun senatorlar tomonidan ma’qullandi. Qonunda samarali, shaffof va raqobatbardosh elektr energiyasi bozorining rivojlanishini qo‘llab quvvatlash ko‘zda tutilgan.
Toshkentda 3 ta mashina ishtirokidagi YTH oqibatida yo‘lovchi ayol vafot etdi
Sergeli tumanida yuqori tezlikdagi Spark qarama-qarshi yo‘ldagi 2 ta mashinaga borib urilgandi. YHXB hodisa oqibatida bir yo‘lovchi vafot etgani va 2 kishi shifoxonaga yotqizilganini ma’lum qildi.
OTMlarga kirish imtihonlari 14-iyuldan boshlanadi
O‘zbekiston davlat oliy ta’lim muassasalariga kirish imtihonlari 14-iyuldan 28-iyulga qadar o‘tkaziladi. Mandat 21−22-avgustda e’lon qilinadi.
O‘zbekiston aeroportlarida birinchi yarim yillikda yo‘lovchilar oqimi 36 foizga oshdi
O‘zbekiston aeroportlarida birinchi yarim yillikda 53,3 mingta reys amalga oshirdi, bu o‘tgan yilning yanvar-iyun oylariga nisbatan 37 foizga ko‘pdir. O‘tgan davrda jami 6,3 milliondan ortiq yo‘lovchiga xizmat ko‘rsatildi va ularning oqimi 36 foizga oshdi.
Davlat xaridlari tizimidagi to‘g‘ridan-to‘g‘ri shartnomalar jamoatchilik muhokamasidan o‘tkaziladi
O‘zbekistonda 1-oktabrdan davlat buyurtmachilari tomonidan to‘g‘ridan-to‘g‘ri shartnomalar ular tuzilishidan oldin jamoatchilik muhokamasidan o‘tkaziladi. Shuningdek, 1-dekabrgacha davlat xaridlari tizimining mobil ilovalari yaratiladi.
Nogironligi bo‘lgan shaxslarning xavfsiz harakatlanishi uchun qanday choralar ko‘zda tutilmoqda?
Prezident ijtimoiy himoya sohasiga oid chora-tadbirlar taqdimoti bilan tanishdi. Takliflar orasida nogironligi bo‘lgan shaxslarning xavfsiz harakatlanishi uchun sharoitlarni kengaytirish, jumladan, binolarni ekspertizadan o‘tkazish, chorrahalarni moslashtirib borish, elektron interaktiv xarita yaratish mavjud.
Qashqadaryoda 14 yoshli qizni jinsiy qullikda saqlagan ayol 7,5 yilga qamaldi
Shahrisabzda 14 yoshli qizni 7 oy qullikda saqlab, turli shaxslar bilan jinsiy aloqa qilishga majburlagan ayol va uning sheriklariga sud hukmi o‘qildi. Ayol JKning ikki moddasi bo‘yicha 7,5 yilga, ikki erkak uch modda bilan 9 yilga qamaldi. Bu kabi jinoyatlar uchun jazo yumshatilmaydi, deb yozdi bolalar ombudsmani.
“Qurilish maydoni 90 foiz tayyor holatga keltirilgan”. Hokimlik — “Boqiy Buxoro” shahar chetiga ko‘chirilishi haqida
Ijtimoiy tarmoqlarda “Boqiy Buxoro” parki shahar chekkasida qurilishi haqida xabarlar tarqaldi. Hokimlikka ko‘ra, bu xabarlar “yolg‘on va haqiqatga to‘g‘ri kelmaydi”. Hozirda loyiha amalga oshiriladigan hududdagi binolar to‘liq demontaj qilinmoqda, qurilish maydoni 90 foiz tayyor holga keltirilgan.
Sport
Futbol bo‘yicha O‘zbekiston terma jamoasining Olimpiada-2024 uchun yakuniy tarkibi ma’lum bo‘ldi
O‘zbekiston olimpiya terma jamoasi bosh murabbiyi Timur Kapadze Parijdagi Olimpiya o‘yinlari uchun yakuniy tarkibni e’lon qildi. Unga 22 nafar futbolchi, jumladan, Eldor Shomurodov, Abbosbek Fayzullayev va boshqalar kirdi. Jamoa birinchi o‘yinini 24-iyulda Ispaniyaga qarshi o‘tkazadi.
Bizni o‘qiyotganingiz uchun rahmat!
