O‘zbekistonda yaqin yillarda ichimlik suvi uchun ijtimoiy norma yo‘lga qo‘yish rejasi yo‘q. Bu haqda 9-iyul kuni AOKAda o‘tkazilgan matbuot anjumanida “O‘zsuvta’minot” mas’ullari ma’lum qildi, deya xabar qildi “Gazeta.uz” muxbiri.
Tadbirda jurnalistlar tomonidan yaqin kelajakda O‘zbekistonda elektr energiyasi va tabiiy gazga joriy etilgani kabi ichimlik suviga nisbatan ham ijtimoiy norma yo‘lga qo‘yilishi haqidagi gap-so‘zlarga izoh so‘raldi.
Shuningdek, Qozog‘istonda ichimlik suvi bo‘yicha tabaqalashtirilgan tarif rejasi ishlab chiqilayotgani, O‘zbekiston qo‘shni mamlakatdan namuna olib, suvni tejash maqsadida mazkur tartibni joriy etish yo etmasligi haqida ham savol berildi.
Xurshid Rahmatullayev / Foto: AOKA
“Ochig‘ini aytaman, bu ma’lumotlar feyk, hech qanday asos yoki hisob-kitobga ega emas. Bizda bunday masala kun tartibida yo‘q. Suv bu — hayotiy ehtiyoj, uni cheklashga yoki qandaydir limit qo‘yishga hozircha hech qanday ehtiyoj yo‘q, bu mening mas’ul shaxs sifatidagi fikrim. Qozog‘istonda bo‘layotgan jarayonlarni biz ham kuzatib turibmiz, ammo buni tabaqalashtirilgan tizim, deyish biroz noto‘g‘ri”, — dedi “O‘zsuvta’minot” AJ boshqaruvi raisi o‘rinbosari Xurshid Rahmatullayev.
Uning so‘zlariga ko‘ra, bunday tajriba Rossiya va Yevropaning bir qator mamlakatlarida ham bor, ya’ni suv resurslarini sutka davomida talab oshadigan paytda ishlatishga ma’lum bir cheklov qo‘yilgan.
“Misol uchun, o‘n besh yil avval talabalik davrimda Germaniyada amaliyot o‘taganimizda, yotoqxonada yashaganmiz. U yerdagi kir yuvish mashinasidan foydalansangiz bir yevro to‘lanardi. Lekin o‘sha texnikani kechasi soat 17:00 dan 20:00 gacha ishlatsangiz, 2 yevro to‘lashingizga to‘g‘ri kelardi, boshqa payt esa 1 yevro edi. Ya’ni bu obi-hayotga talab oshgan paytda suvga nisbatan bosimni kamaytirish maqsadida qilingan bir chora edi”, — dedi kompaniya vakiili.
“O‘zbekistonda suv hisoblagichlar bilan ta’minlanganlik darajasi 87 foizni [tashkil etadi]. Agar 100 foizlik ta’minlanganlik darajasiga erishgan taqdirimizda ham suv zaxirasi va suvni tejash nuqtai nazaridan yaqin kelajakda [ichimlik suvi uchun ijtimoiy norma joriy etish] rejalarimiz yo‘q”, — dedi Rahmatullayev.
