Ismim Elshod, “Gazeta.uz” jurnalistiman. Bir necha kun oldin “Sen dunyoga keraksan” ko‘ngillilar jamoasi bizni 14-iyul kuniga belgilangan turga taklif etdi. O‘sha kuni 40 nafar bola “Mehrning bir kuni” aksiyasi doirasida Toshkent shahri bo‘ylab turli manzillarga olib borildi, maqsad ularning mana shu kunini unutilmas qilish edi. Men ham bu jarayonda qatnashdim.
Bolalar qanday tanlab olindi?
5 yoshdan 15 yoshgacha bo‘lgan 40 bolaning bari Toshkent viloyati Toshkent tumanidagi Oqtom va To‘labek mahallalaridan. Ko‘ngillilar jamoasi ularning oilalaridagi ijtimoiy-iqtisodiy vaziyat bilan tanish: mahalla va qo‘ni-qo‘shnilar ko‘magida oilalar bo‘yicha ma’lumot to‘plangan. Qaysidir oilalarda farzandlar otasiz (yoki onasiz yoxud har ikkisisiz) katta bo‘lmoqda, ayrimlari esa kam ta’minlangan. Jamoa bu oilalarning ba’zilariga oldinroq yordam ham ko‘rsatgan. Oilalar, asosan, loyihaga murojaat qilish yo‘li orqali aksiya qatnashchilariga aylangan.
Manzillar
Soat 8:00 da ikkita avtobus bolalarni Toshkent hayvonot bog‘i oldida kutib turardi. Avvaliga bolalarga “Sen dunyoga keraksan” yozuvi 2 tilda tushirilgan futbolkalar kiydirib chiqildi. Buni hamrohlikka biriktirilgan volontyor yigit-qizlar bajardi.
Shu kuni bolalarni 5 ta manzilga olib borish reja qilingandi — Toshkent hayvonot bog‘i, Ice City, tushlik uchun pitsseriya, Rakat masjidi va Lokomotiv bog‘i. Barcha lokatsiyalarga sayohatlar ularning ma’muriyati bilan kelishilgan holda bepul tashkil etildi.
Kun qahramonlari avvaliga zooparkka, xususan, Dinoparkka olib kirildi. U yerda bolalar ko‘ngillilar hamrohligida hayvonot olami hamda Yura davri dunyosiga sayohat qildi. Bu ayrim bolalarning zooparkka ilk tashrifi ekan.
Bu — Madina. Shu kuni u 7 yoshga to‘ldi. Orzusi — ichida basseyni bo‘lgan qizil rangli uyda yashash.
Ikkinchi manzil sifatida Ice City muz saroyiga borildi. U yerda bolalar 1,5 soatga yaqin yayradi: muzli tepalikdan tushish, qayiqda sayr, poyezd sayohati, yaxshisi, foydalanilgan attraksionlar nomini keltira qolaman — Viking River, Ice Vertigo, Kamic Ice, Bob Mountain. Ha, bolalar ham, biz ham biroz sovuq qotdik!
Shu bilan birpasda tushlik vaqti yetdi. Yoqimli tomosha!
To‘rtinchi manzil — Yakkasaroy tumanidagi Rakat jome masjidi.
Borganlarni u yerda muassasa noibi Muhammadamin Hamdamov kutib oldi. U bolalardan nimalarga qiziqishi, kelajak orzularini so‘radi, bolalarning qo‘liga masjid haqida ma’lumot va rasmlar aks etgan broshyuralarni tutqazdi. Hali o‘qishni bilmaydiganlar, tabiiyki, rasmlarni tomosha qilish bilan cheklandi.
So‘nggi lokatsiya — Lokomotiv bog‘i. U yerdagi barcha attraksionlarda uchish uchun qulaylik yaratib berilgani sababli bolalar vaqti chog‘ o‘tdi.
Oldinroq kitob, chizish uchun planshetlar, plastilin, tasbeh, pazllar, shuningdek, banan va olmalar bilan to‘ldirilgan paketlar tayyorlab qo‘yilgandi, aksiya so‘ngida bolalarga o‘z sovg‘alari topshirildi.
“Sen dunyoga keraksan” loyihasi haqida
Mazkur xayriya loyihasi 2019-yilda tashkil etilgan bo‘lib, Toshkent shahri va Farg‘ona viloyatida faoliyat yuritadi. Asosan, yosh volontyorlardan iborat jamoa turli kasb egalarini bir nuqtaga birlashtirgan. Jamoaning Instagram sahifasida 5,2 mingdan ortiq obunachisi bor, Telegram`dagi guruhida esa mingdan ziyod a’zosi mavjud.
Ko‘ngillilarning so‘zlariga ko‘ra, ular har 2−3 oyda Toshkent shahri va viloyatidagi kam ta’minlangan, boquvchisini yo‘qotgan oilalarga ro‘zg‘or mahsulotlari tarqatadi, “Mehrning bir kuni” aksiyasi doirasida bolalar uchun poytaxtga tur uyushtiradi. Shuningdek, nogironligi bor shaxslar, obodonlashtirish xodimlari uchun ham turli loyihalarni amalga oshiradi.
