Davlat aktivlarini boshqarish agentligi “ToshuyjoyLITI” loyiha instituti ustav kapitalidagi davlat ulushining 61,6 foizini muzokaralarga ommaviy ravishda taklif qilish usuli asosida sotish jarayoni boshlanganini ma’lum qildi. Xususiylashtirish agentligining konsultanti — Abrau Capital.
“ToshuyjoyLITI” AJ turli maqsadlardagi bino va inshootlarni, muhandislik tarmoqlari, avtomobil yo‘llari va yo‘l infratuzilmasini yangidan qurish, rekonstruksiya qilish va kapital ta’mirlash uchun loyiha-smeta hujjatlarini ishlab chiqish bilan shug‘ullanadi.
Institut, shuningdek, qurilishda me’yoriy hujjatlarni, fuqarolik inshootlarining seysmik chidamliligi, fuqarolik inshootlarining namunaviy loyihalarini ishlab chiqish, bino va inshootlarning texnik holatini tekshirish ishlarini olib boradi, bino va inshootlarning yuk ko‘taruvchi konstruksiyalarini tiklash va mustahkamlash loyihalarini ishlab chiqadi, zilzilaga chidamli binolarni qurish sohasida ilmiy-tadqiqot ishlarini, shu jumladan, loyiha-qidiruv ishlarini olib boradi.
“ToshuyjoyLITI” hukumatning 2010-yildagi qarori bilan Markaziy Osiyodagi yetakchi zilzilaga chidamli turar-joy va jamoat binolarini loyihalash instituti — Toshkent zonal namunaviy va eksperimental loyihalash ilmiy-tadqiqot instituti hamda turar-joy va fuqarolik binolarini loyihalashga ixtisoslashgan bosh institut — Toshkent shahri miqyosidagi binolarni loyihalash institutini birlashtirish orqali tashkil etilgan.
DABA, shuningdek, “Uzinjiniring” respublika loyiha instituti ustav kapitalidagi 100 foiz davlat ulushini sotish jarayoni boshlanganini ham e’lon qildi. Konsultant yana Abrau Capital bo‘ladi.
“Uzinjiniring” kompaniyasi loyihaoldi va loyiha hujjatlarini, shu jumladan, DTIA/DTIH hamda TIA/TIHni ishlab chiqish, xorijiy loyiha tashkilotlari tomonidan ishlab chiqilgan loyihaoldi hujjatlarni texnik boshqarish va O‘zbekiston standartlari sohasidagi normativ hujjatlarga moslashtirish bilan shug‘ullanadi.
Institut iqtisodiyotning bazaviy tarmoqlari loyihalarini (loyihalashtirishga doir qismda) texnik jihatdan kuzatib boradi, loyihalarni tender savdolari tashabbuskorlari bilan birgalikda olib boradi va ularga hamrohlik qiladi.
Shuningdek, tarmoq idoralari tomonidan ishlab chiqilgan geologiya, yoqilg‘i-energetika kompleksi, kimyo, neftkimyo va metallurgiya sanoati obyektlarini modernizatsiya va texnik rekonstruksiya qilish konsepsiyalarini ko‘rib chiqadi va muvofiqlashtiradi.
Tanlovlarda ishtirok etmoqchi bo‘lgan kompaniyalar va ularning aksiyadorlari (ishtirokchilari) davlat korxonasi yoki ustav kapitalida davlat ulushi bo‘lgan jamiyat bo‘lmasligi kerak. Ular, shuningdek, YeI va AQSh, yirik xalqaro taraqqiyot banklarining ommaviy sanksiyalar ro‘yxatiga kiritilmagan bo‘lishi lozim.
Ikkala davlat aktivlarining xaridorlari kompaniyalarning asosiy faoliyatini kamida besh yil davomida saqlab qolishi kerak.
