Parij ayni damda katta Olimpiya shahriga aylangan — qayerga qarama Olimpiya halqalari tushirilgan plakatlar yoki shu halqalar rangidagi belgi-ishoralarga ko‘zing tushadi. Vokzalda poyezddan, aeroportda samolyotda tushasanmi, seni birinchi bo‘lib Olimpiada ramzlarini ko‘rasan.
Shaharning sayyohlar to‘planadigan asosiy maskanlari, e’tiborga molik bino-inshootlari ham Olimpiada ruhida bezatilgan. Masalan, G‘alaba arkasi:
Ayni vaqtda, O‘yinlarga rasman start berilishidan avval bunday osori-atiqalarning hammasiga ham avvalgidek yaqinlashish imkoni yo‘q edi. Masalan, Parij meriyasi oldida turli madaniy tadbirlar uchun sahnalar hozirlangan bo‘lib, Olimpiadadan avval ularga kirish imkoni yo‘q edi — sayyohlar ham uzoq-uzoqdan suratga tushishga majbur bo‘layotgandi.
Nafaqat Parij, balki Fransiyaning tashrif qog‘ozchalaridan biri hisoblangan Eyfel minorasi bilan ham xuddi shunday vaziyat yuzaga kelgandi — O‘yinlar boshlanishidan avval unga yaqinlashish imkoni yo‘q edi.
Umuman olganda, shaharda xavfsizlik choralari juda kuchaytirilgandi. Ko‘chalarda qurollangan huquq-tartibot organlari xodimlarini, hatto harbiy xizmatchilarni ko‘rish odatiy hol. Ular bilan birga maxsus yashil libosdagi volontyorlarga ham ko‘p duch kelasiz.
Ammo bu Parij ahli va mehmonlarining bayramona kayfiyatiga zig‘ircha salbiy ta’sir ko‘rsatayotgani yo‘q — deyarli hamma xursand, hamma shod, O‘yinlar ochilishini orziqib kutmoqda.
Eslatib o‘tamiz, Olimpiada, rasmiy ochilish marosimi o‘tkazilmay turib, allaqachon boshlanib bo‘lgan. Xususan, 24-iyul kuni o‘zbekistonlik futbolchilar Ispaniyaga qarshi maydonga chiqib, 1:2 hisobida mag‘lubiyatga uchradi. 25-iyul kuni esa o‘zbekistonlik kamonchilar — Ziyodaxon Abdusattorova va Amirxon Sodiqov debyut qildi.
O‘yinlarda O‘zbekistondan 19 ta sport turi bo‘yicha 75 ta yo‘llanma bilan jami 90 nafar sportchi qatnashadi — mamlakat Olimpiadada ilk bor bunchalik ko‘p sportchi bilan qatnashmoqda. O‘zbekistonliklar bu safargi O‘yinlarda futbol, kamondan o‘q otish, suvga sakrash va ayollar o‘rtasida kurash turlari bo‘yicha debyut qiladi. Olimpiada 11-avgustga qadar davom etadi.
