Iyul — iqlim xususiyatlariga ko‘ra yozning eng issiq oyi. Ushbu yil hududning katta qismida bu oyda o‘rtacha oylik harorat o‘rtacha ko‘p yillik qiymatlarga yaqin bo‘lib, markaziy viloyatlarning qator tumanlarida va respublikaning janubida me’yordan 1−1,7 darajaga yuqori bo‘ldi, deya xabar bermoqda O‘zgidromet agentligi.
“Bu yil iyul oyining katta qismida harorat tartibi juda qulay bo‘ldi, bunday holat O‘zbekistonda yoz faslining o‘rtasi uchun xos emasdir”, — deyiladi hisobotda.
Respublika hududining katta qismida kunduzgi havo harorati +32…+37 daraja atrofida bo‘ldi. Faqat respublika janubida va cho‘l hududlarida ba’zi joylarda havo kunduz kunlari +39…+41 darajagacha isidi.
Iyul oyi uchinchi o‘nkunligining boshidan boshlab issiq asta-sekin ko‘tarila boshladi va o‘nkunlikning o‘rtalariga kelib haroratning maksimal qiymati +38…+41 darajaga, cho‘l hududlari janubida +42…+44 darajaga, O‘zbekistonning eng janubiy nuqtasi — Termiz shahrida esa +45…+46 darajaga yetdi. 25−28-iyul kunlari issiq eng yuqori cho‘qqiga ko‘tarilgan kunlar kuzatildi. Oyning oxirgi kunlarida harorat biroz pasaydi.
Sinoptiklarga ko‘ra, o‘tgan iyul oyida O‘zbekistonning barcha hududlarida maksimal havo harorati o‘zining rekord ko‘rsatkichlardan ancha uzoq bo‘ldi.
Maksimal harorat +40 va undan yuqori bo‘lgan kunlar soni 2024-yil iyul oyida hududning katta qismida 1−3 kunni, cho‘l hududlarda 4−7 kunni tashkil etdi.
Maksimal harorat +40 va undan yuqori bo‘lgan eng ko‘p kunlar soni dasht hududida (Muborak) 11 kun va eng chekka janubda (Termiz) 15 kun kuzatildi.
O‘zbekistonning turli hududlarida 2024-yil iyul oyida maksimal havo harorati 40 daraja va undan yuqori bo‘lgan kunlar soni (2014−2023-yillar iyul oylari uchun o‘rtacha va maksimal qiymatlar bilan solishtirganda).
O‘tgan iyul oyida maksimal havo harorati +40 va o‘tgan yuqori bo‘lgan kunlar soni so‘nggi 10 yil ichida eng kam bo‘ldi.
Hududning katta qismida bunday issiq kunlarning eng ko‘p soni 2019-yil iyul oyida kuzatilgan. Masalan, Toshkentda 2019-yil iyul oyida ketma-ket 14 kun davomida havoning maksimal harorati +40 darajadan yuqori, eng issiq kunlarda esa +43 darajaga yetgan.
Respublika shimolida maksimal havo harorati +40 darajadan yuqori bo‘lgan eng ko‘p kunlar soni 2018-yil iyul oyida kuzatilgan. Ushbu yilda Qoraqalpog‘iston Respublikasi, Xorazm va Navoiy viloyatlarida ba’zi joylarda havo haroratining tarixiy maksimumlari +46…+48 daraja qayd etilgan.
Odatda, yozning o‘rtalarida kuzatilgani kabi o‘tgan iyul oyida yomg‘ir juda notekis yog‘di. Yomg‘ir kamdan kam va hududning katta qismida biroz yog‘di. Farg‘ona vodiysi viloyatlarida, O‘zbekistonning tog‘oldi va tog‘li hududlarida yomg‘irlar tez-tez yog‘di va ayrim kunlarda jadalligi biroz bo‘ldi.
Chimboy meteostansiyasi (Qoraqalpog‘iston Respublikasining shimoli) hududida kuchli jala yomg‘ir yog‘ishi holati eng g‘ayrioddiy bo‘ldi, bunda 7-iyul kuni 2 soat 40 daqiqada 23 mm yomg‘ir yog‘di, bu holat ushbu hudud uchun iyul oyi bir kecha-kunduzlik yog‘ingarchilik miqdorining mutlaq maksimumini (ilgari 14 mm bo‘lgan) yangiladi, deyiladi xabarda.
Respublika shimolida va cho‘l hududlarida ayrim kunlarda shamol tezligi 15−20 m/s gacha, Bekobod meteostansiyasi hududida 22−25 m/s gacha kuchaydi, ba’zi joylarda chang-to‘zonlar bilan kuzatildi, ko‘rinuvchanlik 1000 m gacha yomonlashdi.
Navoiy meteostansiyasi hududida 7-iyul kuni shamol tezligi 35 m/s ga yetdi. Bu ushbu hudud uchun rekord shamol tezligining takrorlanishidir.
Jizzax, Surxondaryo, Andijon va Farg‘ona viloyatlarining ayrim tog‘oldi va tog‘li hududlarida jala yomg‘irlar yog‘ishi hisobiga sel-suv toshqin hodisalari yuzaga keldi.
