Isroil Tehronda HAMAS siyosiy yetakchisi Ismoil Haniya o‘ldirilganidan keyin Eron va uning ittifoqchilari hujumini kutmoqda, deb yozdi Reuters.
Tel-Aviv Haniyaning o‘limi uchun javobgarlikni o‘z zimmasiga olmadi, biroq HAMAS va Eron rasmiylari uning o‘limida Isroilni aybladi va qasos olishga va’da berdi. Livanning Eron qo‘llovidagi iyul oyi oxirida Isroilning Beyrutga bergan havo hujumida qo‘mondonlaridan biri halok bo‘lgan “Hizbulloh” guruhi ham Haniyaning o‘limiga javob berishga va’da berdi.
Isroil endi HAMAS, “Hizbulloh” va Yaman husiylariga qarshi ko‘p frontli urush xavfiga duch kelmoqda. Eron yaqin kunlarda javob berishi kutilmoqda, Isroil rasmiylari esa “Hizbulloh” birinchi bo‘lib hujum boshlashiga ishonmoqda.
Isroil harbiy kuchlari shay holatga keltirildi. O‘tgan hafta havo hujumi haqida ogohlantirish tizimi real vaqt rejimida matnli xabarlar yuborish uchun kengaytirildi.
Ko‘plab mahalliy organlar aholiga zarur bo‘lmagan ishlarni kamaytirishni, qo‘riqlanadigan hududlar yaqinida qolishni va ommaviy joylardan qochishni maslahat berdi.
Isroil shimolidagi Hayfa shahrida ommaviy bombapanohlar raqamli tizimlar bilan jihozlandi, endi hujum paytida ularni masofadan turib ochish mumkin. Ular, shuningdek, generatorlar bilan jihozlangan. Bir necha yerosti avtoturargohlarida minglab aholi uchun yetarli bo‘lgan vaqtinchalik boshpanalar tashkil etilgan.
Isroil markazidagi Ramla shahrida milliy tez yordam xizmati Magen David Adom (MDA) haddan tashqari qalin beton devorlar, portlash eshiklari va havo qulflari bilan himoyalangan yerosti xizmat ko‘rsatish markazida donorlik qonini yig‘moqda.
Isroil rasmiylari tayyorlayotgan yana bir ssenariy — bu naqd pulni ommaviy bekor qilish. “Bank tizimida banknotlar va tangalar yetkazib berish yetarli bo‘lishi kutilmoqda”, — dedi Isroil banki.
“Men Isroil fuqarolari hushyor turishini bilaman va sizdan bir narsani so‘rayman — sabrli va xotirjam bo‘ling”, — dedi bosh vazir Binyamin Netanyahu 7-avgust kuni yangi askarlar bilan uchrashuvda. Uning qo‘shimcha qilishicha, Isroil “mudofaaga ham, hujumga ham” tayyor.
Eron rejalarini qayta ko‘rib chiqqan bo‘lishi mumkin
Eron Haniyaning o‘limiga javoban Isroilga qarshi yirik hujum uyushtirish fikridan qaytishi mumkin, deb yozadi Politico.
AQSh prezidenti Jo Bayden ma’muriyati so‘nggi kunlarda “diplomatik kanallar orqali” Tehronni mojaroning kuchayishini to‘xtatishga ko‘ndirish uchun ishlamoqda. AQShning Yaqin Sharqdagi ittifoqchilari Eronni Isroilga ommaviy zarba berish faqat keskinlikni kuchaytirishi va ikki davlat o‘rtasida to‘g‘ridan-to‘g‘ri qarama-qarshilik xavfini keltirib chiqarishidan ogohlantirdi, deya ta’kidladi nashr suhbatdoshlari.
AQSh, shuningdek, Eronni Haniyaning o‘limiga nisbatan javob choralarini qayta ko‘rib chiqishga chaqirdi, chunki bu, aftidan, maxfiy operatsiya natijasi, kattaroq hujumning bir qismi emas. Amerika tomoni, shuningdek, hujum natijasida birorta ham Eron fuqarosi halok bo‘lmaganiga ishora qildi.
Amerika rasmiylariga ko‘ra, Tehron Vashington fikriga ko‘proq rozi bo‘lmoqda, garchi dastlab uni rad etgan bo‘lsa ham. Hozirda AQSh Eron yaqin kelajakda Isroilga hujum qilishini kutmayapti, deb yozdi Politico.
