Yanvar-iyul oylarida O‘zbekiston 983,7 million dollarlik gaz import qildi, deyiladi Statistika agentligining “Gazeta.uz” o‘rgangan tashqi savdo haqidagi hisobotida. Ko‘rsatkich 2023-yilning birinchi yetti oyiga nisbatan 4,9 baravar (qiymat ko‘rinishida) ko‘p, o‘shanda yetkazib berish 201 million dollarni tashkil qilgan. Bu, shuningdek, 2023-yildagi gaz importining umumiy hajmidan (694,9 million dollar) ham oshadi.
Yanvar oyida “ko‘k yoqilg‘i” importi 35,6 million dollarni tashkil qildi, fevralda — 3,7 baravar ko‘proq yoki 131,1 million dollar, martda — 193,5 million dollar, aprelda — 102,6 million dollar, mayda — 180,4 million dollar, iyunda — 166,3 million dollar, iyulda — 174,2 million dollar. Statistika agentligi yetkazib berishning fizik hajmini ochiqlamaydi.
O‘zbekiston asta-sekin o‘tgan yilgi gaz eksporti hajmiga qaytmoqda. Yil boshidan buyon xorijiy yetkazib berish 323,1 million dollarga yetdi, bu o‘tgan yilning shu davriga (341,9 million dollar) nisbatan 5,5 foizga kam. Yanvarda bu ko‘rsatkich 21 million dollarni tashkil etdi, fevralda — 5,7 million dollar, martda — 18,7 million dollar, aprelda — 16,9 million dollar, mayda — 7,6 million dollar, iyunda — 181,5 million dollar.
Iyul oyida eksport 81,7 million dollarni tashkil etdi, bu o‘tgan yilning iyuliga nisbatan (63,5 million dollar) 1,3 barobar ko‘p. O‘zbekiston gazni asosan Xitoyga, shuningdek, Qirg‘iziston va Tojikistonga yetkazib bermoqda.
XXR Bosh bojxona boshqarmasi ma’lumotlariga ko‘ra, yil boshidan buyon O‘zbekiston gazining importi 304,18 million dollarni tashkil qilgan. Yanvarda Xitoy O‘zbekistondan 38,8 million dollarlik gaz import qilgan, fevralda — 18,6 million, aprelda — 11,4 million, mayda — 85 million, iyunda — 81,1 million, iyulda — 69,2 million. Bunda ham fizik hajmlar ochiqlanmagan.
Yetti oyda gaz qazib olish hajmi 26,15 milliard kub metrni tashkil etdi, bu o‘tgan yilning shu davriga nisbatan 4,8 foizga yoki 1,3 milliard kub metrga kam.
2023-yil oktabr oyidan boshlab O‘zbekiston Rossiya gazini Qozog‘iston hududi orqali teskari rejimda import qilmoqda. RFdan gaz importi hajmini oshirish uchun magistral gaz tizimini modernizatsiya qilishga 500 million dollar sarmoya kiritish rejalashtirilayotgani ma’lum qilingandi. Loyiha mamlakatning energetik xavfsizligini ta’minlash, mavsumiy notekis iste’molni qoplash uchun qo‘shimcha gaz hajmlari va ushbu yoqilg‘ini yetkazib beruvchi kafolatlangan manbalar diversifikatsiyasida muhim ahamiyatga ega, deb atalmoqda.
