Toshkent shahri IIBB tarmoqlarda “Pepsi Music Fest 2024” musiqa festivaliga kelgan fuqarolar jamoat tartibini buzayotgani aks etgan video tarqalgach, holat yuzasidan ma’lumot berdi.

6-sentabr kuni Yunusobod tumanida musiqa festivalining birinchi kuni o‘tkazilgan. Tadbir soat 18:00 dan 22:20 ga qadar bo‘lib o‘tgan.

Qayd etilishicha, yig‘ilganlar orasida bir necha fuqarolar jamoat tartibini buzib, jamiyatda yurish-turish qoidalarini mensimasdan, mayda bezorilik sodir etgan.

“IIO xodimlari tomonidan ko‘rilgan chora-tadbirlar natijasida ularning shaxsi aniqlanib, 5 nafar voyaga yetmagan shaxsning ota-onasiga Ma’muriy javobgarlik to‘g‘risidagi kodeksning 47-moddasi (Bolalarni tarbiyalash va ularga ta’lim berish borasidagi majburiyatlarni bajarmaslik)ga ko‘ra ma’muriy bayonnoma rasmiylashtirildi. Qolgan fuqarolarga nisbatan to‘plangan hujjatlar yuzasidan tergovga qadar tekshiruv o‘tkazilmoqda”, — deyiladi bosh boshqarma xabarida.

Shuningdek, tekshiruvlar davomida fuqarolar tan jarohati olgani haqida xabar kelib tushmagan.

Ma’lumot uchun, musiqa festivali 6, 7 va 8-sentabr kunlari Alisher Navoiy nomidagi milliy kutubxona hamda Hyatt mehmonxonasiga tutash maydonda bo‘lib o‘tadi.

Avvalroq mazkur tadbirlar o‘tkazilishi sababli bir qator ko‘chalar mashinalar uchun yopilishi haqida yozgandik.