Avgust oyi oxirida Toshkentda bir necha oy ichida birinchi marta uy-joy ijarasi narxi ko‘tarildi. Bu haqda OLX portali ma’lumotlarini tahlil qilgan Makroiqtisodiyot va hududiy tadqiqotlar instituti (MHTI) xabar berdi.
MHTI avvalroq poytaxtda o‘rtacha ta’mirlangan xonadonlar uchun ijara narxlari 0,7 foizga pasaygani, to‘liq ta’mirlangan xonadonlar uchun esa o‘rtacha 0,3 foizga oshgani haqida xabar bergan edi.
Avgust oyida narxlarning oshishiga bir qancha omillar, xususan, sentabr oyida universitetlarda yangi o‘quv yili boshlanishi bo‘yicha kutilmalar ta’sir ko‘rsatdi, deya qayd etdi MHTI.
O‘tgan oyda o‘rtacha ta’mirlangan xonadonlarni ijaraga olish narxi iyul oyiga nisbatan 1,9 foizga, to‘liq ta’mirlangan holda 0,3 foizga oshdi.
Oy davomida o‘rtacha ta’mirlangan uy-joylar segmentida 1 xonali kvartiralar ijarasi narxlari o‘rtacha 1,3 foizga, 2 xonali kvartiralar 2,1 foizga, 3 xonali kvartiralar 1,7 foizga, 4 xonali kvartiralarning narxi esa 2,5 foizga o‘sdi.
Sergeli va Olmazor tumanlarida o‘rtacha ta’mirlangan kvartiralarni ijaraga olishning nisbatan arzon narxlari qayd etildi. Ushbu hududlarda 1 xonali kvartirada vaqtincha yashash mos ravishda o‘rtacha 285 va 301 dollar, 2 xonali kvartiralar 348 va 359 dollar, 3 xonali kvartiralar 387 va 414 dollar, 4 xonali kvartiralar 460 va 471 dollar bo‘ldi.
Eng qimmat ijara haqi Mirobod va Yakkasaroy tumanlarida qolmoqda. Bu hududlarda uy egalari 1 xonali kvartira uchun o‘rtacha 350 va 349 dollar, 2 xonali kvartira uchun 445 va 455 dollar, 3 xonali uchun 550 va 585 dollar, 4 xonali kvartira uchun 736 va 603 dollar so‘ramoqda.
To‘liq ta’mirlangan kvartiralar toifasida ijara narxi 1 xonali uylar uchun eng kuchli — 3,4 foizga oshdi. 2 xonali kvartiralar uchun narx atigi 0,1 foizga oshdi, 3−4 xonali kvartiralar uchun esa, aksincha, ijara narxi arzonlashdi (-0,4 va -2 foiz).
MHTI ma’lumotlariga ko‘ra, to‘liq ta’mirlangan xonadonlarni ijaraga berishning eng past narxlari Sergeli tumanida bo‘lib, bu yerda 1 xonali kvartirada yashash o‘rtacha 335 dollar, 2 xonali kvartirada 416 dollar, 3 xonali kvartirada yashash — 501 dollar.
Keyingi o‘rinda Uchtepa tumani 1 xonali kvartira uchun 377 dollar, 2 xonali uchun 437 dollar, 3 xonali uchun 563 dollar so‘rayapti.
To‘liq ta’mirlangan 1 xonali kvartira ijarasining eng yuqori narxi Mirobod va Shayxontohur tumanlarida mos ravishda 456 va 421 dollar, 2 xonali kvartiralar 688 va 715 dollar, 3 xonali kvartiralar 1006 va 1014 dollar.
