Siyosat
“O‘zbekiston — biz uchun muhim hamkor” — Germaniya kansleri
O‘zbekiston Germaniya uchun juda muhim hamkor, jumladan, yaqin kelajak uchun ham, dedi Germaniya kansleri Olaf Shols. U mamlakatlar o‘rtasida imzolangan migratsiya bitimini alohida qayd etdi, shuningdek, Shavkat Mirziyoyev bilan muzokaralar chog‘ida qanday masalalar ko‘tarilganini sanadi.
“Yangi format”: Shavkat Mirziyoyev va Olaf Shols yetakchi kompaniya hamda banklar vakillari bilan uchrashdi
O‘zbekiston prezidenti va Germaniya kansleri Samarqandda yetakchi kompaniya va banklar vakillari bilan uchrashdi. Shavkat Mirziyoyev unda asosan xususiy sektordagilar ishtirok etganini aytib, buni “yangi format” deb atadi. “Yashil energetika”, kimyo sanoati, mashinasozlik kabilar ustuvor yo‘nalish sifatida ko‘rildi.
Shavkat Mirziyoyev 17-sentabr kuni amaliy tashrif bilan Ostonada bo‘ladi
Shavkat Mirziyoyev 17-sentabr kuni amaliy tashrif bilan Ostona shahrida bo‘ladi. Prezident u yerda “Markaziy Osiyo — Germaniya” ikkinchi sammitida qatnashadi.
Iqtisodiyot
O‘zbekistonda modulli mehmonxona qurish va jihozlash uchun subsidiya ajratiladi
2024-yil 1-oktabrdan 2026-yil 1-noyabrgacha muvofiqlik sertifikati berilgan yangi tashkil etilgan hamda kamida 10 ta moduldan iborat bo‘lgan modulli mehmonxona uchun uning toifasidan qat’i nazar subsidiya ajratiladi. Subsidiya modulli mehmonxonada yaratilgan har bir joy uchun 1 mln so‘mdan belgilanadi.
O‘zbekiston AQSh bilan bojxona sohasida hamkorlik va o‘zaro yordam to‘g‘risida bitim imzoladi
Bojxona qo‘mitasi raisi Akmalxuja Mavlonov va AQShning Bojxona chegara xizmati komissari Troy Miller o‘rtasida bitim imzolandi. Hujjat axborot almashish, giyohvand moddalar va odam savdosi, jinoiy daromadlarni legallashtirish kabilarga qarshi kurashda hamkorlikni nazarda tutadi.
Avgustda O‘zbekiston ko‘chmas mulk bozorining faolligi pasaydi, ikkilamchi bozorda narx biroz oshdi
Avgust oyi yakunlariga ko‘ra, O‘zbekistonda uy-joy oldi-sotdi bitimlari soni oy davomida 3,5 foizga, yil davomida esa 20,8 foizga kamaydi. Toshkentda ikkilamchi uy-joy narxlari ikki oylik pasayishdan keyin o‘sishni boshladi. Poytaxtda ikkilamchi xonadon narxi o‘rtacha 1 kv metr uchun 1128 dollarni tashkil qildi.
Jamiyat
Xodimlariga kuch ishlatgan Inbazar kiyim do‘koni muhokama mavzusiga aylandi. Tafsilotlar
Inbazar kiyim do‘koni xodimi boshqa bir xodimni kaltaklagach, voqea jamoatchilik e’tiboriga tushdi. Shundan so‘ng do‘kon asoschisining xodimlariga xatosi uchun kuch ishlatgani aks etgan videolari ham tarqaldi. Rahbarga nisbatan tergovga qadar tekshiruv ketmoqda. Voqealar rivoji.
Qashqadaryoda “KamAZ” tirkamasi chiqib ketib, 3 ta transportga urildi, bir kishi jarohatlandi
Dehqonobod tumanida “KamAZ"ning tirkamasi harakat vaqtida asosdan chiqib ketdi. Boshqaruvsiz qolgan tirkama 3 ta transportga urildi. Hodisada haydovchilardan biri jarohatlandi.
Toshkentda ko‘chmas mulk bilan bog‘liq firibgarlikda gumonlangan 3 kishi qo‘lga olindi
Toshkentda 3 erkak fuqarolarning ko‘chmas mulkini aldov yo‘li bilan egallab, uni o‘ziga garov sifatida rasmiylashtirganlikda ayblanmoqda. Garov qarz miqdoridan 3−4 baravar ko‘p bo‘lgan va qarz oluvchilarga kelishilganidan kamroq mablag‘lar berilgan. Ular qamoqqa olingan.
Ilmiy va innovatsion faoliyat yurituvchi yuridik shaxslarning reyestrini joriy etish rejalashtirilmoqda
O‘zbekistonda ilmiy va innovatsion faoliyat yurituvchi yuridik shaxslarning reyestri joriy etilishi ko‘zda tutilmoqda. Ular har yillik faoliyati natijalari bo‘yicha baholab boriladi. Ilmiy tanlovlarda va buyurtmalarni shakllantirishda ularning reyting baholash natijalari ko‘rsatkichlari e’tiborga olinadi.
“Toshkentdagi daraxtlarning reyestri 2,5 yilda shakllantiriladi” — ekologiya vaziri
Sentabr oxiridan poytaxtdagi daraxtlarning reyestrini shakllantirish boshlanadi. Ekologiya vaziriga ko‘ra, jarayon 2,5 yil davom etadi. “Bunga 100 nafar volontyor jalb etilib, har biriga planshet beriladi. Elektron bazaga daraxtlarning turi, holati va boshqa jihatlari kiritiladi”, — dedi Aziz Abduhakimov.
Sotuvchiga nisbatan mayda bezorilik sodir etgan Inbazar ishchilari qamaldi
Inbazar kiyim do‘konining qorovuli sotuvchini so‘kib, kaltaklagani uchun 7 sutkaga qamaldi. Holatni “qolgan xodimlarga o‘rnak bo‘lishi uchun” videoga olgan katta menejerga esa 5 sutka ma’muriy qamoq jazosi tayinlandi.
Hafta davomida issiq harorat saqlanib qoladi
Ushbu haftada havo issiq va asosan quruq bo‘ladi, kunduzi harorat +30 darajagacha yetadi. Seshanba va payshanba kunlari ayrim hududlarda vaqti-vaqti bilan yomg‘ir yog‘ishi mumkin.
Sport
Foto: Qoraqalpog‘istonning Borsakelmas hududida ekomarafon o‘tkazildi
Qoraqalpog‘istondagi Borsakelmas sho‘rxok hududida o‘tkazilgan “Sayyoramiz kelajagiga qo‘shgan hissamiz” xalqaro ekomarafonida 11 ta davlatdan 250 nafar professional va havaskor yuguruvchi ishtirok etdi. Ular orasida Nike elchisi Farah Majid va Adidas vakili G‘ani Sulaymon ham bor. Foto.
Shaxmat Olimpiadasida O‘zbekiston erkaklar jamoasi vaziyatni o‘nglamoqda, ayol shaxmatchilar esa ilk bor mag‘lubiyatga uchradi
Budapesht shahrida o‘tkazilayotgan shaxmat Olimpiadasining beshinchi turida O‘zbekiston erkaklar terma jamoasi Moldova terma jamoasini mag‘lub etdi (raqib jamoa o‘tgan turda ham mag‘lubiyatga uchragandi). Ayollar terma jamoasi esa ilk mag‘lubiyatini Gruziya bilan o‘yinda qabul qilib oldi.
Jahon
Markaziy Yevropada kuchli suv toshqini yuz berdi, kamida 15 kishi halok bo‘ldi
“Boris” bo‘roni tufayli kuchli yomg‘irlar Markaziy Yevropada suv toshqinini keltirib chiqardi: kamida 15 kishi halok bo‘ldi, minglab uylar suv ostida qoldi. Polshada tabiiy ofat rejimi joriy etildi.
AQShda Trampga qarshi yangi ehtimoliy suiqasdga urinish tekshirilmoqda
AQShda prezidentlikka nomzod Donald Tramp golf o‘ynayotgan golf klubi yaqinida otishma yuz berdi. Gumonlanuvchi hibsga olindi, FQB sobiq prezidentga qarshi ehtimoliy suiqasdga urinishni tekshirmoqda. Bu so‘nggi ikki oy ichidagi mana shunday ikkinchi hodisadir.
“Manipulyativ diktatorlar ustozi” Alberto Fuximori erkin OAV bilan qanday kurashgan edi?
11-sentabr kuni 10 yildan ortiq vaqt davomida Peru prezidenti bo‘lgan Alberto Fuximori vafot etdi. U yangi zamon diktatorlari haqidagi “Manipulyativ diktatorlar” kitobining asosiy qahramonlaridan biri hisoblanadi. “Gazeta.uz” mazkur asardagi Fuximori bilan bog‘liq parchani taqdim etadi.
Bizni o‘qiyotganingiz uchun rahmat!
