Toshkent shahrida issiq suv va issiqlik ta’minoti uchun tariflar oshiriladi. Bu haqda xalq deputatlari poytaxt kengashining ushbu taklifni ma’qullagan 12-sentabrdagi qarorida aytiladi.
Aholiga issiqlik va issiq suv ta’minoti xizmatlarining yangi chakana tarifi 15 foizga oshadi va 105 754 so‘m/Gkal o‘rniga 121 617 so‘mni tashkil etadi. Oxirgi marta narx joriy yilning 2-aprelida — o‘tgan isitish mavsumi tugaganidan keyin ko‘tarilgandi.
Yuridik shaxslar uchun tarif ham 15 foizga oshadi — bir Gkal uchun 212 606 so‘mdan 244 497 so‘mgacha. Oxirgi o‘sish 2023-yil oxirida bo‘lgan. Yangi tariflarning kuchga kirish sanasi keltirilmagan.
Joriy yilning fevral oyida Veolia Energy Tashkent kompaniyasi kengashga Toshkent shahri aholisiga issiq suv va issiqlik ta’minoti tarifini 15 foizga oshirish taklifini kiritgandi. Korxona rahbarining aytishicha, shahar aholisi bazaviy tarifning atigi 14 foizini to‘laydi, qolgani esa shahar budjetidan subsidiya shaklida qoplanadi.
Eslatib o‘tamiz, poytaxt budjeti barcha xarajatlarining to‘rtdan bir qismi aholi uchun pasaytirilgan tariflardan foydalanish natijasida issiqlik ta’minoti korxonalarining yo‘qotishlarini qoplashga yo‘naltiriladi. 2024-yilda buning uchun 1,97 trillion so‘m yo‘naltirish rejalashtirilgan, bu 2023-yil prognozidan (1,6 trillion so‘m) 22,8 foizga ko‘pdir.
