O‘zbekiston milliy terma jamoasi futzal bo‘yicha jahon chempionati guruh bosqichi 3-turi so‘nggi o‘yinida Kosta-Rikaga imkoniyatni boy berdi. 20-sentabr kuni Toshkentda bo‘lib o‘tgan uchrashuv 3:5 hisobida yakunlandi.
Kosta-Rika birinchi bo‘limni o‘z foydasiga yakunladi (2:1). Ikkinchi bo‘limda O‘zbekiston 30-daqiqaga kelib oldinga chiqib oldi (3:2), ammo 32-daqiqada Ixtiyor Ropiyev ikki daqiqa ichida bir nechta qoidabuzarliklarga yo‘l qo‘yib, ikkinchi sariq kartochkani oldi. Shundan so‘ng raqiblar uchta gol urib, g‘alabani ilib ketdi.
Birinchi turda O‘zbekiston Gollandiya bilan 3:3 hisobida durang o‘ynagandi. Ikkinchi davrada esa Paragvayga 1:4 hisobida imkoniyat boy berilgan.
Shu tariqa milliy terma jamoa uchta o‘yindan so‘ng bir ochko jamg‘arib, A guruhida so‘nggi o‘rinni egalladi.
Kosta-Rika uchinchi o‘rin bilan pley-off yo‘llanmasini qo‘lga kiritdi. Paragvay birinchi, Gollandiya ikkinchi bo‘ldi.
Kosta-Rika 5:3 O‘zbekiston
03'13″ Edvin Kubilo (1:0, video)
13'36″ Mashrab Odilov (1:1)
19'18″ Yosel Leon (2:1)
26'07″ Ilhomjon Hamroyev (2:2)
29'33″ Samariddin Berkinov (2:3)
31'25″ Ixtiyor Ropiyev (chetlatilish)
31'33″ Diyego Chavarriya (3:3)
32'07″ Minor Kabalseta (4:3)
37'16″ Jan Salas (5:3)
Foto
Turnir haqida
Futzal bo‘yicha jahon chempionati 14-sentabrdan 6-oktabrga qadar O‘zbekistonning uchta shahri: Andijon, Buxoro va Toshkentda bo‘lib o‘tmoqda. Turnirda oltita guruhga bo‘lingan 24 ta jamoa ishtirok etadi. Amaldagi jahon chempioni 2021-yilda chempionlikni qo‘lga kiritgan Portugaliya hisoblanadi.
Oltita guruhda birinchi va ikkinchi o‘rinni egallagan 12 ta jamoa, shuningdek, uchinchi o‘rinni egallagan to‘rtta eng yaxshi jamoa turnirning pley-off bosqichiga yo‘l oladi.
O‘tgan JCH-2021 da O‘zbekiston 1/8 finalda Eronga mag‘lub bo‘lgandi.
