Poytaxtdagi “Ilhom” teatrida 1968−1988-yillarda bo‘lib o‘tgan Osiyo, Afrika va Lotin Amerikasi mamlakatlarining Toshkent xalqaro kinofestivaliga bag‘ishlangan Destination: Tashkent arxiv ko‘rgazmasi ochildi.
Ko‘rgazma ishtirokchi davlatlar o‘rtasida kino sohasidagi hamkorlik va muloqotni rivojlantirishga xizmat qilgan tadbirning tarixiy ahamiyati haqida hikoya qiladi.
Birinchi festival 1968-yil 21-oktabrdan 31-oktabrgacha Toshkentda bo‘lib o‘tgan va unda 49 davlatdan 240 dan ortiq kino delegatlari qatnashgan. Keyingi yigirma yil ichida u nafaqat madaniy almashinuv uchun imkoniyatlar yaratdi, balki munozara va birdamlik maydoni bo‘lib ham xizmat qildi.
Amerikalik huquq himoyachisi va fuqarolik huquqlari faoli Anjela Devis, hind aktyori Raj Kapur kabi o‘sha davrning taniqli shaxslari festival doirasida uchrashdi. Poytaxt mehmonlari Toshkent kinofestivalini belgilab bergan xalqaro birdamlik g‘oyasini o‘zida mujassam etdi.
Arxiv ko‘rgazmasi festival sahnalari va Senegal, Kambodja, Hindiston, Nikaragua, Yaponiya va Mo‘g‘uliston kabi mamlakatlardan kelgan ishtirokchilarning fotosuratlariga asoslangan. Suratlar, shuningdek, tadbirning yorqin lahzalarini aks ettiradi: ochilish marosimlari, filmlar namoyishi va mukofotlar taqdimoti.
Arxiv hujjatli filmi, taklifnomalar, dasturiy bukletlar va ishtirokchilarning shaxsiy buyumlari festivaldagi xalqaro uchrashuvlar muhitini aks ettiruvchi ko‘rgazmani to‘ldirib turadi.
Ko‘rgazma O‘zbekiston Gyote instituti va Milliy arxiv bilan hamkorlikda hujjatshunos Elyor Ne’matov va Dona Qulmatova kuratorligida Davra jamoasi ishtirokida tayyorlandi. U 26−29-sentabr kunlari bo‘lib o‘tadigan Destination: Tashkent kino va diskurs festivali doirasida tashkil etildi.
Ko‘rgazma 14-oktabrga qadar davom etadi. Kirish bepul.
