Vengriya poytaxti Budapeshtda bo‘lib o‘tgan 2024-yilgi shaxmat Olimpiadasida qatnashgan O‘zbekiston terma jamoasi 24-sentabr kuni Toshkent xalqaro aeroportida tantanali kutib olindi. “Gazeta.uz” fotomuxbiri Murod Yusuf ushbu marosimdan fotoreportaj tayyorladi.
Unda sport vaziri Adham Ikramov, Mahallalar uyushmasi raisi Qahramon Quronboyev, Ma’naviyat va ma’rifat markazi rahbari Otabek Hasanov, Toshkent shahri hokimi o‘rinbosari Durdona Rahimova ishtirok etdi. Shuningdek, jamoatchilik vakillari, sportchilarning yaqinlari va jurnalistlar ham qatnashdi.
Marosimda Prezident administratsiyasining ijtimoiy rivojlanish departamenti boshlig‘i Odil Abdurahmonov davlat rahbarining shaxmat Olimpiadasi ishtirokchilariga yo‘llagan табригиni o‘qib eshittirdi.
Shundan so‘ng, O‘zbekiston shaxmat federatsiyasi raisi Alisher Sa’dullayev, shaxmatchilar Nodirbek Abdusattorov va Nodira Nodirjonova hamda shaxmatchi Shamsiddin Vohidovning otasi so‘zga chiqib, o‘z fikrlarini bildirdi.
“Birinchi navbatda, muhtaram prezidentimizga tashakkur bildiramiz. Olimpiada paytida biz uchun barcha kerakli narsalar muhayyo qilindi. Bu Olimpiada bizga qiyin kechdi. Chunki Hindiston juda kuchli jamoa bilan kelibdi. 2022-yilgi Olimpiadada ularni o‘z uyida mag‘lub etgan edik. Bu safar esa durang natijani qayd etdik. Jamoamiz nomidan shuni aytishim mumkinki, 2026-yilda xalqimiz va prezidentimizning ishonchini oltin medallar bilan oqlashga harakat qilamiz. Xudo xohlasa, keyingi safar Olimpiada kubogi O‘zbekistonga qaytadi”, — dedi Nodirbek Abdusattorov.
Aeroportda shaxmat Olimpiadasida umumjamoa hisobida 3-o‘rinni egallagan O‘zbekiston erkaklar jamoasining har bir a’zosiga BYD Chazor avtomobili sovg‘a qilindi.
Ma’lumot uchun, O‘zbekistonning erkaklar jamoasi 189 mamlakat orasida umumjamoa hisobida 3-o‘rinni egalladi. Shuningdek, taxtalar kesimida Shamsiddin Vohidov oltin, Nodirbek Abdusattorov kumush medal egasiga aylandi. Ayollar jamoasi esa o‘zining avvalgi natijasi (19-o‘rin)ni yaxshilab, 169 mamlakat orasida 12-o‘rinni egalladi. Shuningdek, Nodira Nodirjonova esa o‘z taxtasida ikkinchi eng yaxshi natijani qayd etib, kumush medalni qo‘lga kiritdi.
Foto
