AQSh elchisi Jonatan Xenik O‘zbekistonning “Hududgazta’minot” gaz taqsimlash kompaniyasi va Merilendda joylashgan Climate Compass shu’ba korxonasi GasGreen Asia qo‘shma loyihasining yutuqlarini nishonlash maqsadida tadbir o‘tkazdi, deb xabar berdi diplomatik missiya matbuot xizmati.
2023-yil mart oyida boshlangan ushbu loyiha O‘zbekistonning yer usti gaz taqsimlash tizimidagi tabiiy gaz sizib chiqishini aniqlash va ta’mirlashga oid bo‘lib, u O‘zbekistonning yashil iqtisodiyotga o‘tishi hamda uning “Metan bo‘yicha global majburiyat” doirasidagi ishlariga hissa qo‘shadi.
Tadbirda O‘zbekiston hukumatining rasmiylari, “Hududgazta’minot”, GasGreen Asia, YeTTB vakillari, AQSh diplomatlari hamda mahalliy matbuot vakillari ishtirok etdi. Koreyaning Ecoeye Co., Ltd. kompaniyasi loyihaning asosiy sarmoyadori bo‘lib, u Koreya bilan iqlim bo‘yicha Parij kelishuvining 6.2-moddasiga asosan loyihani muvofiqlashtiradi.
“AQSh O‘zbekistonning yashil iqtisodiyotga keng ko‘lamli o‘tishga bo‘lgan harakatini olqishlaydi. Ushbu loyiha O‘zbekistonning to‘g‘ridan-to‘g‘ri xorijiy investitsiyalarni jalb qilish hamda issiqxona gazlari emissiyasini kamaytirish borasidagi sa’y-harakatlarini qo‘llab-quvvatlaydi”, — dedi elchi Henik.
Qayd etilishicha, loyiha boshlanganidan beri 50 mingdan ortiq gaz sizib chiqish holati aniqlandi, o‘lchandi va ta’mirlandi, buning natijasida yiliga yetti million tonnadan ortiq karbonat angidrid ekvivalenti emissiyasi kamayishiga erishildi. Loyiha 200 dan ortiq mahalliy ish o‘rni yaratdi, jumladan, muhandislar, ma’lumotlar bo‘yicha mutaxassislar va loyiha menejerlari amerikalik texnik mutaxassislardan intensiv trening oldilar.
Ta’mirlash natijasida “Hududgazta’minot” aksiyadorlik jamiyati gaz yo‘qotilishining oldini olish orqali o‘nlab million dollar mablag‘ni tejab, atrof-muhitga katta foyda keltirdi.
O‘zbekiston 2022-yilda butun dunyo bo‘ylab metan chiqindilarini kamaytirishga qaratilgan global majburiyatga qo‘shilgan. Metan emissiyasini kamaytirish O‘zbekistonning Iqlim o‘zgarishi bo‘yicha Parij kelishuvi doirasida milliy miqyosda belgilangan hissalarini qondirishga qaratilgan sa’y-harakatlarining muhim tarkibiy qismidir.
Birlashgan Millatlar Tashkilotining Atrof-muhit bo‘yicha dasturi ma’lumotlariga ko‘ra, metan emissiyasi global isishning taxminan 30 foizini tashkil etadi va tobora ortib borayotgan muammodir.
Merilend shtati Betesda shahrida joylashgan Climate Compass issiqxona gazlari emissiyasini kamaytirish loyihalari uchun logistika va texnik xizmatlarni taqdim etishda yetakchi kompaniya hisoblanadi. Yigirma yildan ortiq tajribaga ega bo‘lgan Climate Compass o‘zining gaz sizib chiqishini aniqlash va ta’mirlash dasturlari orqali tabiiy gaz infratuzilmasini yaxshilashga ixtisoslashgan.
Climate Compass kompaniyasiga tegishli bo‘lgan va u boshqaradigan GasGreen Asia kompaniyasi ushbu dasturni amalga oshirish uchun 2023-yil mart oyida “Hududgazta’minot” kompaniyasi bilan shartnoma imzoladi. Loyiha kelajakdagi uglerod emissiyasini kamaytirish uchun olinadigan kreditlarni sotish hisobiga to‘liq moliyalashtiriladi.
