O‘zbekiston Oliy Majlisi Senati 30-sentabr kuni bo‘lib o‘tgan yig‘ilishda Xitoy bilan maxfiy ma’lumotlarni o‘zaro himoya qilish to‘g‘risidagi hukumatlararo bitimni ratifikatsiya qilish to‘g‘risidagi qonunni ma’qulladi. Hujjat prezidentga imzolash uchun yuborilgan.
Bitim 2023-yil 18-may kuni Sian shahrida prezident Shavkat Mirziyoyevning Xitoyga tashrifi doirasida imzolangan.
Senator Anvar To‘ychiyevning ta’kidlashicha, mintaqadagi hozirgi keskin o‘zgaruvchan harbiy-siyosiy vaziyat “o‘zaro maxfiy axborot xavfsizligini ta’minlash” uchun qonuniy asoslarni kuchaytirishni talab qiladi.
Bitim 19 ta moddadan iborat. O‘zbekiston tomonidan Davlat xavfsizlik xizmati vakolatli organ etib belgilandi.
15-moddaga ko‘ra, xalqaro hujjat nomuayyan muddatga tuziladi. Bitim davlat ichki tartib-taomillari bajarilganligi to‘g‘risidagi oxirgi xabarnomadan keyin kuchga kiradi.
Bitimda uzatilayotgan va qabul qilinayotgan har qanday shakldagi maxfiy axborotni o‘zaro himoya qilish, shuningdek, milliy qonunchilik bo‘yicha maxfiylik darajasi, maxfiylik (“alohida muhimlik,” “mutlaqo maxfiy,” “maxfiy”) belgilarini taqqoslash, maxfiy axborotni himoya qilish, uni uzatish va undan foydalanish bilan bog‘liq masalalarni aniqlashtirish nazarda tutilgan.
Eslatib o‘tamiz, O‘zbekiston Qozog‘iston, Ukraina, Germaniya, Belarus, Ozarbayjon, Rossiya va boshqa davlatlar bilan maxfiy ma’lumotlarni o‘zaro himoya qilish bo‘yicha kelishuvlarga ega. Iyul oyida xuddi shunday hujjat Qirg‘iziston va AQSh bilan imzolandi.
