20-sentabr kuni Madaniyat vazirligi Vazirlar Mahkamasining ommaviy tadbir o‘tkazish uchun ruxsat olish tartibiga o‘zgartirishlar kiritishni nazarda tutuvchi qarori loyihasini muhokama uchun e’lon qildi.
Gap ommaviy tadbirlar, jumladan, konsertlar, xalqaro va milliy ahamiyatga molik tadbirlar o‘tkazish uchun ruxsat olish uchun pasportga o‘zgartirishlar kiritish haqida ketmoqda.
Loyihada konsert-ko‘ngilochar tadbirlarni o‘tkazuvchi tashkilotchi “O‘zbekkonsert” davlat muassasasiga boshqa hujjatlardan tashqari, bo‘lajak tadbirning aniq ssenariysini batafsil taqdim etishi shart bo‘lgan yangi talabni joriy etish taklif qilinmoqda.
Hozirda ruxsatnomalarni berish faqat Ichki ishlar vazirligi va uning hududiy bo‘linmalariga yuklangan. Tasdiqlash talab qilinadigan boshqa organlar yo‘q. Endi yuqoridagi hujjatlarni, shu jumladan, ssenariyni ham bir vaqtning o‘zida tasdiqlovchi organlarga yuborish taklif qilinmoqda.
“O‘zbekkonsert"ni tasdiqlovchi organlar ro‘yxatiga kiritish rejalashtirilgan bo‘lib, unda ekspert komissiyalari orqali quyidagilar hisobga olinadi:
- tadbir dasturi yoki ssenariyning g‘oyaviy-badiiy saviyasi;
- namoyish etilishi rejalashtirilgan repertuarning milliy an’analar va umumbashariy qadriyatlarga mos kelishi;
- tadbir dasturi yoki ssenariysida Vatanga sadoqat, rna yurtga muhabbat kabi tuyg‘ularning aks ettirilishi.
Keyin ekspert komissiyasi ruxsatnoma berish yoki berishni rad etish to‘g‘risida xulosa tuzadi. Agar komissiya salbiy xulosa chiqarsa, unda rad etish sabablari va hujjatlarni ko‘rib chiqish uchun qayta topshirish muddati ko‘rsatiladi.
Bundan tashqari, tadbir tashkilotchilaridan arizalarni ko‘rib chiqish uchun yig‘imlar joriy etish taklif etilmoqda: Toshkent shahridagi tadbirlar uchun — BHMning 5 baravari (1,875 mln so‘m), viloyat markazlarida — BHMning 3 baravari (1,125 mln so‘m), boshqa aholi punktlarida — BHMning 1 baravari (375 ming so‘m).
Ariza beruvchi, agar ular turli joylarda o‘tkazilsa, har bir tadbir uchun alohida yig‘im to‘lashi kerak bo‘ladi.
Agar “O‘zbekkonsert” ekspert komissiyasi rad etganidan keyin hujjatlar xulosada ko‘rsatilgan muddatda qayta ekspertizadan o‘tkazish uchun taqdim etilgan bo‘lsa, ariza beruvchidan qo‘shimcha yig‘im undirilmaydi. Ushbu muddatdan so‘ng ariza beruvchi umumiy asosda ruxsat olish uchun ariza berishi mumkin.
Agar ariza beruvchi tadbirni o‘tkazishdan bosh tortsa, avval olingan to‘lov qaytarilmaydi.
Bundan tashqari, arizani ko‘rib chiqish muddati 10 kundan 15 kungacha oshiriladi. “O‘zbekkonsert” va uning hududiy bo‘linmalari tadbir o‘tkaziladigan joyga borib, ssenariyning haqiqiyligini tekshirmoqchi bo‘lsa, bu muddat 30 kungacha oshirilishi mumkin.
Agar taqdim etilgan loyihaga nisbatan ssenariyga 10 foizdan ko‘p bo‘lgan o‘zgartirishlar kiritish zarur bo‘lsa yoki murojaat qaytarilsa, ariza beruvchi umumiy asoslarda ommaviy tadbirlarni o‘tkazish uchun takroran yangidan murojaat qilishi lozim.
Tasdiqlovchi organning xulosasisiz vakolatli organ (Ichki ishlar vazirligi) ruxsatnoma bermaydi. Ruxsatnoma xulosasiz berilgan taqdirda vakolatli organ javobgar bo‘ladi.
Madaniyat vazirligi ushbu hujjatning qabul qilinishi “ommaviy-madaniy va konsert-tomosha tadbirlarining badiiy saviyasi va mazmundorligini oshirish, ssenariy, repertuarlarini ko‘rib chiqish va baholash tizimini yanada takomillashtirish” imkonini beradi, deb kutmoqda.
Bundan tashqari, bu ommaviy tadbirlarni o‘tkazish qoidalariga, konsert-tomosha tadbirini o‘tkazishda sahna madaniyatiga rioya etilishi, milliy qadriyatlar va an’analarga ijrochilarning chiqishlarida ular tomonidan amalga oshiriladigan nojoiz xatti-harakatlar, jumladan, tomoshabinlarga salbiy ta’sir ko‘rsatuvchi xatti-harakatlarga yo‘l qo‘yilmasligini ta’minlashi kutilmoqda.
Madaniyat vazirligining ta’kidlashicha, loyiha bilan “ommaviy-madaniy va konsert-tomosha tadbirlariga ruxsat berish tartiblari ixtisoslashtiriladi hamda bu jarayonning to‘liq ochiq va shaffof bo‘lishi ta’minlanadi”.
Loyiha muhokamasi 5-oktabrgacha davom etadi.
