oktabr oyi boshida ijtimoiy tarmoqlarda O‘zbekistonda o‘qituvchilarning ish haqi kechiktirilgani haqida xabarlar tarqaldi. Dastlabki shikoyatlar 4-oktabrda paydo bo‘ldi, foydalanuvchilar sentabr oyi uchun maosh hali hisoblanmaganini ma’lum qilishdi.
7-oktabr kuni Milliy axborot agentligi (O‘zA) direktorining birinchi o‘rinbosari Xushnudbek Xudoyberdiyev Maktabgacha va maktab ta’limi vazirligi rahbariyati bilan bog‘langani haqida ma’lum qildi. Uning so‘zlariga ko‘ra, MMTV barcha texnik muammolar hal etilganini va o‘qituvchilarning ish haqini hisoblash jarayoni boshlanganini ma’lum qilgan.
Uning ta’kidlashicha, xodimlarning 50% oylik maoshi to‘langan (bu haqda post 7-oktabr kuni kechqurun e’lon qilingan).
8-oktabr kuni kunduzi ba’zi o‘qituvchilar hali ham maosh olmaganliklarini aytishdi. Shuningdek, o‘qituvchilarning malakasini yangilash bilan bog‘liq muammolar tufayli ular to‘liq maosh olmaganliklari haqida xabarlar paydo bo‘ldi. Kelgusi oyda ular o‘rtasidagi farqni qoplash va’da qilingan.
O‘qituvchilardan biri anonimlik sharti bilan “Gazeta.uz”ga ma’lum qilishicha, mehnat shartnomasi bo‘yicha ish haqi oyning birinchi kunigacha to‘lanishi kerak, biroq odatda pul ikkinchi yoki uchinchi kuni o‘tkazilgan.
Iqtisodiyot va moliya vazirligining tahririyatga ma’lum qilishicha, 9-oktabr kuni soat 9:00 holatiga o‘qituvchilar tomonidan ish haqi 95 foizga o‘tkazilgan, qolgan qismini kun oxirigacha to‘lash choralari ko‘rilmoqda. Barcha budjet tashkilotlariga keladigan bo‘lsak, ish haqining 98 foizi xodimlarga to‘langan.
Mehnat kodeksining 333-moddasiga ko‘ra, ish beruvchi tomonidan ish haqi to‘lash, ta’tilga haq to‘lash, mehnat shartnomasi bekor qilingandagi to‘lovlar va (yoki) xodimga to‘lanishi lozim bo‘lgan boshqa to‘lovlar muddati buzilgan taqdirda, ish beruvchi ularni foizlar (pul kompensatsiyasi) to‘lagan holda to‘lashi shart. Kompensatsiya to‘lov muddatidan keyingi kundan boshlab amaldagi to‘lov kunigacha bo‘lgan har bir kechiktirilgan kun uchun Markaziy bankning shu vaqtdagi qayta moliyalashtirish stavkasidan kelib chiqqan holda hisoblanadi.
Xodimga to‘lanishi lozim bo‘lgan pul kompensatsiyasi miqdori MBning qayta moliyalashtirish stavkasining 10 foizi miqdorida (0,74 foiz atrofida) belgilanadi.
Ko‘rsatib o‘tilgan pul kompensatsiyasini to‘lash majburiyati ish beruvchining ish haqini to‘lash kechikishida aybi bor-yo‘qligidan qat’i nazar yuzaga keladi.
Bunday hollarda kechikish uchun o‘qituvchilar uchun ish beruvchi bo‘lgan har bir maktab moddiy javobgar bo‘ladi. Kompensatsiya shartlari maktablarda jamoa shartnomasida belgilanishi kerak.
Kambag‘allikni qisqartirish va bandlik vazirligi matbuot xizmatining ma’lum qilishicha, kompensatsiya to‘lanmaganda xodimlar Davlat mehnat inspeksiyasiga murojaat qilishlari mumkin, u foizlarni undirish choralarini ko‘radi. Mehnat inspeksiyasi raqamlari — (71) 200−06−00, (71) 239−41−12.
“Gazeta.uz” MMTVga qo‘shimcha savollar yubordi.
Bugungi kunda Maktab va maktabgacha ta’lim vazirligining budjeti 46,6 trln so‘mni tashkil etib, shundan 84 foizi yoki 39 trln so‘mi (oyiga 3 trln so‘mdan ortiq) ish haqi va unga tenglashtirilgan boshqa to‘lovlarga to‘g‘ri kelmoqda. Ularni 545 ming o‘qituvchi va 200 mingdan ortiq maktabgacha ta’lim muassasalari xodimlari oladi.
Prezident Shavkat Mirziyoyev 12-avgust kuni 1-oktabrdan budjet xodimlarining ish haqini 10 foizga, pedagog va tibbiyot xodimlarining ish haqini 15 foizga oshirish to‘g‘risidagi farmonni imzolagandi.
