Shavkat Mirziyoyev 15-oktyabr kuni Olmaliq kon-metallurgiya kombinati faoliyati va yangi investitsiya loyihalari bilan tanishdi.
Prezident matbuot xizmati xabariga ko‘ra, so‘nggi olti yilda Olmaliq kombinatida sanoat mahsuloti 1,8 baravar, mahalliylashtirish 7,7 baravar, investitsiya 13 baravar oshgan. “Raqamli OKMK — 2030” strategiyasi doirasida 70 dan ortiq loyihalar amalga oshirilgan.
Ayni paytda yangi majmualar qurilib, mavjud quvvatlar oshirilmoqda, deyiladi xabarda. Xususan, 2021-yilda “Yoshlik-1” koni negizida 3-mis boyitish fabrikasi qurilishi boshlangan bo‘lsa, endi bu loyihaning ikkinchi bosqichi doirasida 4-mis boyitish fabrikasi ishga tushadi.
Davlat rahbari ramziy tugmani bosib, ushbu yangi zavod qurilishini boshlab berdi.
Qiymati 5,3 milliard dollarlik bu loyiha orqali yiliga 146 ming tonna katodli mis, 13 tonna oltin va 73 tonna kumush olish quvvatlari yaratiladi. Yillik ishlab chiqarish hajmi 1,9 milliard dollarga yetadi. Fabrika va uning infratuzilmalarida 3 mingdan ortiq kishi ishlaydi.
Loyihaga Italiyaning Wood hamda Buyuk Britaniyaning Worley Parsons kompaniyalari jalb qilingan. Ishlab chiqarishda yuqori texnologik, ekologik xavfsiz va tejamkor texnologiyalar qo‘llanishini belgilangan.
Ta’kidlanishicha, hozirgi kunda Olmaliq kon-metallurgiya kombinatining 5-mis boyitish fabrikasi ham loyihalashtirilmoqda.
