O‘zbekistondagi partiyalar aholi bilan o‘zaro aloqalarni yaxshilash uchun siyosiy texnologiyalarning zamonaviy usullarini o‘zlashtirishi kerak. Bu haqda 25-oktabr kuni “Xalqaro hamkorlik tashabbuslari haftaligi” doirasida Senat raisining birinchi o‘rinbosari Sodiq Safoyev ma’lum qildi, deb xabar bermoqda “Gazeta.uz” muxbiri.
Senator jurnalistlarning saylovchilar sifatida partiyalar dasturlaridagi farqlarni ko‘radimi, degan savoliga shunday javob berdi: “Biz o‘tayotgan, proporsional va majoritar yondashuvlarni o‘z ichiga olgan yangi saylov tizimi har bir partiyaning o‘z yuzi va pozitsiyasi borligini ko‘rsatishi kerak. Dinamikasiga nazar solsak, o‘tgan yilgi saylovlarga nisbatan bu yil partiyalar yanada aniqroq dasturlarni ilgari surayotganini ko‘rish mumkin”.
“Partiyalar orasida siyosiy texnologiyalardan foydalanish va raqobatning kuchayishi ko‘proq ko‘zga tashlanadi. Bu ijobiy tendensiya va u rivojlantirilishi kerak”, — dedi senator.
“Gap saylovlar va tanlash imkoniyatlari haqida ketyapti. Saylovchilar, tabiiyki, kimga va nima uchun ovoz berayotganini aniq tushunishi kerak. Hozir partiyalar o‘rtasida ilgari bo‘lmagan munozaralar bo‘lib o‘tmoqda. Ilgari xalqimiz aniq kishilarga ovoz bergan bo‘lsa, bugun partiyalarni ham saylamoqda. Men buni o‘ta ijobiy jarayon deb hisoblayman va men bilan uchrashgan xalqaro kuzatuvchilar ham buni qayd etishdi”, — dedi Sodiq Safoyev.
U “saylovoldi targ‘ibot-tashviqot ishlarida nimalar o‘zgarishini xohlagan bo‘lardingiz?” degan savolga quyidagicha javob berdi: “Bizda siyosiy texnologiyalar bilan shug‘ullanadigan kompaniyalar yo‘q. Bu fan, bu san’at. O‘z dasturini saylovchilar ongiga professional tarzda yetkazish, o‘z elektoratiga yo‘l topish ma’lum bir partiyaning sharfi yoki kepkasini kiyish bilan belgilanmaydi. Bu sohaning ham o‘z texnologiyalari bor”.
“Kelajakda saylov jarayonlari rivojlanishi bilan partiyalarimiz zamonaviy siyosiy texnologiyalar usullarini o‘zlashtirishi va shu orqali aholi bilan ishlashni takomillashtirishi kerak”, — dedi Senat rahbarining birinchi o‘rinbosari.
Siyosiy texnologiyalar — bu saylov kampaniyalarini o‘tkazish, jamoatchilik fikrini shakllantirish va siyosiy jarayonlarga ta’sir ko‘rsatish kabi maqsadlarga erishish uchun qo‘llaniladigan usullar va vositalar yig‘indisidir. Jarayon strategiyalar ishlab chiqish, ommaviy axborot vositalari, ijtimoiy tarmoqlardan foydalanish, shuningdek, saylovchilar va jamoat tashkilotlari bilan to‘g‘ridan-to‘g‘ri hamkorlikni o‘z ichiga oladi.
