Turkiya poytaxti Anqara shahridagi O‘zbekiston elchixonasida deputatlar saylovi uchun ovoz berish jarayoni o‘tmoqda. “Gazeta.uz” muxbiri Elshod Salimov unda ishtirok etib, reportaj tayyorladi.
Elchixonaning konsullik bo‘limida qayd etilgan saylovchilar ro‘yxatida 1040 kishining nomi ko‘rsatilgan. Bundan tashqari, mazkur ro‘yxatda bo‘lmagan saylovchilar ham ovoz berib ketmoqda.
Kelganlar saylov xonasiga kirishdan oldin 5 ta partiyaning dasturi bilan tanishishi mumkin, bannerda ular ilgari surayotgan rejalarning asosiylari qayd etilgan. Soat mahalliy vaqt bilan 16:00 ga kelib, jarayonda 237 kishi ovoz berdi.
Shuningdek, saylovda ovoz berishni xohlagan, biroq turli sabablarga ko‘ra elchixona hududiga kela olmagan fuqarolarning uyiga borib, ulardan ham ovoz olib kelish reja qilingan.
Elchixonada saylovchilar osh va somsa bilan mehmon qilindi. Shundan so‘ng ular qo‘lda bayroq bilan vatan haqida qo‘shiq kuylab, raqsga ham tushdi.
Diplomatik missiya vakillarining so‘zlariga ko‘ra, 18−19-oktabr kunlari Anqara konsullik okrugiga qarashli 67 ta hududda 1452 nafar saylovchi muddatidan oldin ovoz berish jarayonida qatnashgan.
Foto
O‘zbekistonning Turkiyadagi elchisi Alisher Agzamxodjayev.
Ovoz berishda ishtirok etgan o‘zbekistonlik talabalar.
