O‘zbekistonlik professional bokschi Murodjon Ahmadaliyev (12−1, 9 KO) meksikalik Rikardo Espinosa Franko (30−4, 25 KO) bilan chempionlik jangini o‘tkazadi, deya xabar bermoqda World of boxing promotions promouterlik kompaniyasi.
Bokschilar birinchi yarimengil vaznda vaktinchalik WBA kamari uchun jang qiladi. Uchrashuv 14-dekabr kuni Monte-Karloda (Monako) bo‘lib o‘tadi.
O‘tgan yilning aprel oyida 29 yoshli o‘zbekistonlik Murodjon Ahmadaliyev yengil vazn toifasida WBA va IBF kamarlaridan mahrum bo‘lib, filippinlik bokschi Marlon Tapalesga (39−4, 20 KO) yutqazib qo‘ygandi. Dekabr oyida u sakkizinchi raundda meksikalik Kevin Gonsalesni (27−1−1, 14 KO) nokautga uchratib, WBA chempionligi unvoni uchun majburiy da’vogarga aylandi.
WBA uni Naoya Inouega (28−0, 25 KO) qarshi jang o‘tkazishini rejalashtirgandi, ammo keyinchalik unvonni himoya qilish uchun sentabr oyida yaponiyalik bokschi Ti Djeya Doeniga (26−4, 20 ko) qarshi jang qilishga ruxsat berdi. Naoya Inoue esa 24-dekabrda IBF va WBO reytingida birinchilikda turgan Sem Gudman bilan uchrashadi (19−0, 8 KO).
Murodjon Axmadaliyev 1994-yil 2-noyabrda Namangan viloyatida tug‘ilgan. U havaskor boksda Osiyo chempioni (2017), jahon chempionatining 2-o‘rin sohibi (2015) va 2016-yilgi Olimpiadaning bronza medali sovrindoridir. Shuningdek, u 8 ta jangda ikkita (IBF va WBA) chempionlik kamarini qo‘lga kiritgan o‘zbekistonlik yagona sportchi bo‘lib turibdi.
