AQSh Moliya vazirligining Xorijiy aktivlarni nazorat qilish boshqarmasi (OFAC) Rossiya Federatsiyasi harbiy-sanoat kompleksini rivojlantirish bilan bog‘liq 275 ga yaqin shaxs va tashkilotlarga nisbatan sanksiyalar kiritdi. Bu haqda Spot xabar qildi.
SDN-ro‘yxatga 400 ga yaqin jismoniy va yuridik shaxslar, shu jumladan, Rossiya mudofaa vazirining besh nafar o‘rinbosari kiritilgan. Shuningdek, “Rosatom Raqamli yechimlar” va “Rosatom Mikroelektronika,” shina ishlab chiqaruvchi “Kordiant,” “Chip va Dip” kompaniyasi, “Transmashxolding” bosh direktori Kirill Lipa va Moskva aviatsiya instituti ham cheklovlarga uchradi.
Bundan tashqari, sanksiyalar Xitoy, Shveysariya, Turkiya, BAA, Hindiston va boshqa mamlakatlarning chet el fuqarolari va yuridik shaxslariga ham ta’sir ko‘rsatdi.
AQSh Moliya vazirligi O‘zbekistondagi ikkita kompaniya — Uzstanex va The Elite Investment Group`ni sanksiyalar ro‘yxatiga kiritdi.
Korxonalar va tashkilotlarning yagona davlat registriga ko‘ra, Uzstanex 2018-yil iyul oyida ro‘yxatdan o‘tgan va “mexanik dastgohlarning ulgurji savdosi” bilan shug‘ullanadi. Toshkent shahrining Yashnobod tumanida joylashgan kompaniyaning ustav fondi 65 mln so‘mni tashkil etadi. Firmaning yagona ta’sischisi — Abramov Vasiliy Vitalevich, uning direktori — Boysov Dmitriy Aleksandrovich.
The Elite Investment Group 2024-yil yanvar oyida “ulgurji nomutaxassis savdo” uchun tashkil etilgan. Ustav fondi 3 mln so‘m bo‘lgan kompaniya Toshkent viloyatining Yangiyo‘l tumanida joylashgan. Uning asoschisi va direktori — Kazakbayeva Nodira Abdusattorovna.
AQSh Davlat departamentining ma’lum qilishicha, The Elite Investment Group 2024-yilning mart oyidan may oyiga qadar Rossiya kompaniyalariga, shu jumladan, AQShda ro‘yxatdan o‘tgan va Rossiyada joylashgan GTS Group kompaniyasiga yuqori ustuvorlikdagi tovarlarning umumiy ro‘yxatidan (CHPL) taxminan 190 ming dollarlik mahsulotlar, shu jumladan, Turkiyaning Guclu Global kompaniyasidan agent-tashuvchi sifatida foydalangan holda elektr transformatorlarini yetkazib bergan.
2023-yil noyabr oyida AQSh O‘zbekistondan Mvizion kompaniyasiga qarshi sanksiyalar kiritgan edi. AQSh Savdo vazirligi ma’lumotlariga ko‘ra, u Rossiya armiyasi uchun dronlar ishlab chiqarish bilan bog‘liqligi aniqlangan.
Fevral oyi oxirida AQSh Moliya vazirligi sanksiyalar ro‘yxatini yana bir bor to‘ldirganini e’lon qilgandi. Ular orasida poytaxtda joylashgan Polar Star Logistics transport kompaniyasi, shuningdek, O‘zbekiston fuqarosi — Rossiya kichik energetika assotsiatsiyasi prezidenti va BAAdagi “Biznes Rossiya” savdo uyi direktori Maksim Zagornov bor.
