Samarqand shahrida avtobus haydovchisi yo‘lning belgilanmagan qismidan o‘tayotgan voyaga yetmagan piyodani urib yubordi, deya xabar bermoqda viloyat Yo‘l harakati xavfsizligi matbuot xizmati.
Qayd etilishicha, holat 14-noyabr kuni soat taxminan 08:00 atrofida Amir Temur ko‘chasida sodir bo‘lgan. Haydovchi F.S. Isuzu jamoat transportini boshqarib ketayotib, 12-maktab yaqinida yo‘lning o‘ng tomonidan chap tomoniga o‘tayotgan 3-sinf o‘quvchisini urib yuborgan. YTH oqibatida piyoda voqea joyida vafot etgan.
Holat yuzasidan haydovchiga nisbatan Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lsa) bilan jinoyat ishi qo‘zg‘atilgan va Jinoyat protsessual kodeksining 211-moddasi tartibida ushlangan.
Hozirda dastlabki tergov harakatlari olib borilmoqda.
Aytish joizki, Samarqand viloyati YHXB xabarda ilova qilgan surat voqea joyidan bo‘lishi mumkin. Suratning chap tomonida siz ajratish chizig‘ida turgan maktab o‘quvchisining maketini ko‘rishingiz mumkin. Bunday inson maketlari ko‘pincha maktablar yaqinidagi ko‘chalarda o‘rnatiladi. Shu bilan birga, suratda maktab yaqinida bolalarga yo‘lni xavfsiz kesib o‘tishga imkon beradigan piyodalar o‘tish joyi yo‘q — u fotosuratda ham, xaritada ham ko‘rinmaydi.
“Gazeta.uz” piyodalarning kartondan yasalgan maketlarini o‘rnatish ko‘chalar xavfsizligini ta’minlashi emas, balki, aksincha, xavf-xatarni oshirishi haqida ko‘p yozgan.
Urbanist Arkadiy Gershman “Gazeta.uz”ga bergan izohida shunday dedi: “Bu usul xavfli, chunki mashina haydab ketayotgan odamlar bu yerda bolalar maketlari borligiga ko‘nikib qolishadi, shunga ko‘ra ular rostdan ham bolalar yoki kattalar turganida sekinlashmay qo‘yadilar. Bu o‘tish joyida haydovchilarning sekinlashishi uchun sabab sifatida qabul qilinmaydi, chunki ko‘z bunga ko‘nikib qoladi va aslida u avvalgidan ham yomonroq bo‘ladi”, — deb hisoblaydi mutaxassis.
Bundan tashqari, siz maketlar orqasida haqiqiy bolalar turganini sezmasligingiz mumkin. Biroq butun mamlakat bo‘ylab piyodalar maketlarini o‘rnatish davom etmoqda. Kuni kecha Toshkent viloyat Yo‘l harakati xavfsizligi boshqarmasi 40 dan ortiq piyodalar, jumladan, maktab o‘quvchilari va keksalar maketlari o‘rnatilayotganini xabar qildi.
Toshkent viloyati YHXB.
Yo‘llarda, ayniqsa, maktablar va bog‘chalar yaqinida piyodalar xavfsizligini qanday samarali yaxshilash mumkin?
Harakatni jismonan sekinlashtirish kerak: xavfsizlik orollari, ko‘tarilgan yoki relefli piyodalar yo‘laklari, sifatli yo‘l chiziqlari, faqat o‘tkazuvchining o‘zi emas, balki unga yaqinlashish yo‘llarining ham yaxshi yoritilishi, piyodalar uchun qulay trotuarlar zarur. Shuningdek, tezlikni nazorat qilish kameralari ham ortiqcha bo‘lmaydi.
Oxirgi paytlarda O‘zbekistonning Toshkent, Samarqand, Buxoro va boshqa shaharlarida maktablar yaqinida baland piyodalar o‘tish joylari o‘rnatish boshlandi, biroq bu ishlarning ko‘lami yoki aniq rejalar hozircha ma’lum emas.
