25-noyabr kuni Shavkat Mirziyoyevga avtomobil sanoatida qilinayotgan ishlar va 2025-yilga mo‘ljallangan rejalar haqida axborot berildi. Bu haqda prezident matbuot xizmati xabar berdi.
O‘zbekiston sanoatida avtomobilsozlik ulushi 10 foizni tashkil etadi, xususan, o‘tgan o‘n oyda 338 mingta yengil avtomobil ishlab chiqarilgan. Shuningdek, 1 ming 400 turdagi butlovchi qismlar mahalliylashtirilib, iqtisodiy choralar natijasida sohada tannarx 4 foiz kamaygan. Eksport 455 million dollar bo‘lgan.
Yig‘ilishda “O‘zavtosanoat” aksiyadorlik jamiyati raisi Ulug‘bek Rozuqulov oldindagi rejalar va vazifalar yuzasidan axborot berdi.
“O‘zavtosanoat” raisi Ulug‘bek Rozuqulov.
Jumladan, kelasi yil 450 mingta avtomobil ishlab chiqarish va eksportni 700 million dollarga yetkazish maqsad qilingan. Hududiy korxonalar bilan kooperatsiyani kuchaytirib, mahalliylashtirishni oshirish bo‘yicha aniq rejalar ishlab chiqilgan.
Xususan, 700 ta detalni o‘zlashtirish bo‘yicha 325 million dollarlik 63 ta loyiha amalga oshirilishi rejalashtirilmoqda.
Bundan tashqari, Jizzaxdagi BYD kompaniyasi bilan hamkorlikdagi elektromobil zavodida modellar qatorini kengaytirish ko‘zda tutilmoqda. Hozirda u yerda Chazor va Song Plus Champion kabi mashinalar ishlab chiqariladi.
Qiymati 300 million dollarlik ikkinchi bosqichda elektromobillar sonini yiliga 200 ming donaga, uchinchi bosqichda 500 ming donagacha yetkazish rejalashtirilgan.
Davlat rahbari xitoylik hamkorlar bilan kelishib, qo‘shimcha quvvatlarni qurish, elektromobillar uchun butlovchi va ehtiyot qismlarni izchil o‘zlashtirib borish bo‘yicha ko‘rsatmalar berdi.
Kooperatsiya asosida mahalliy korxonalarga buyurtmalarni shakllantirish vazifasi qo‘yildi.
