Senatning Mudofaa va xavfsizlik masalalari hamda Fan, ta’lim va sog‘liqni saqlash masalalari qo‘mitalarining 29-noyabr kungi qo‘shma majlisida O‘zbekistondagi yod tanqisligi bo‘yicha holat tahlil qilindi. Bu haqda yuqori palata matbuot xizmati xabar berdi.
Majlisda mazkur qo‘mitalar hamkorligida o‘tkazilgan “Yod yetishmasligi kasalliklari profilaktikasi to‘g‘risida”gi qonunning yodlangan tuz va yodlangan oziq-ovqat mahsulotlarini ishlab chiqarish hamda qayta ishlashda xo‘jalik yurituvchi subyektlar tomonidan standartlarning majburiy talablariga rioya etilishi ustidan davlat nazoratini amalga oshirishga oid qismi ijrosini o‘rganish natijalari muhokama qilindi.
Hozirda mamlakatda yod tanqisligi holatlarining tarqalish darajasi 31 foizni tashkil etib, 20 yil mobaynida 2,5 barobarga kamaygan.
“Biroq, O‘zbekiston hali ham yod tanqisligi bo‘yicha og‘ir hudud bo‘lib qolmoqda. Aholi orasida endemik buqoqdan kasallanish ko‘rsatkichlarini kamaytirish va osh tuzini yodlash bo‘yicha talablarni xalqaro standartlarga muvofiqlashtirish zaruriyati ham yuzaga kelgan. Ayniqsa, 2023-yilda yod tanqisligi kasalligi har 100 ming aholiga Qoraqalpog‘iston Respublikasida (2160,7), Surxondaryo (1883,3), Jizzax (1494) Buxoro (1262,2) viloyatlarida mamlakat ko‘rsatkichlariga nisbatan (912,4) baland bo‘lgani tashvishli holdir”, — deyiladi xabarda.
Shu davrda yod tanqisligi ko‘rsatkichi bolalar va o‘smirlar orasida mamlakat bo‘yicha har 100 ming aholiga o‘rtacha 712,3 va 3593,6 nafarni tashkil etgan. Qayd etilishicha, ushbu ko‘rsatkichlar mamlakatda “yod tanqisligi pandemiyasi” davom etayotganini anglatadi.
2007-yilda qabul qilingan qonunda yod yetishmasligi kasalliklarining ommaviy profilaktikasi oziq-ovqatga yodlangan tuz ishlatish va yodlangan oziq-ovqat mahsulotlarini iste’mol qilish orqali amalga oshirilishi belgilangan.
Lekin 2024-yilning 9 oyi yakuniga ko‘ra o‘tkazilgan o‘rganishlar shuni ko‘rsatganki, mamlakatda 94 ta osh tuzi ishlab chiqaruvchi, sotuvchi va undan foydalanuvchi korxona mavjud va ularning bor-yo‘g‘i 24 tasida laboratoriyalar bor, faqatgina 72 tasida dozatorlar o‘rnatilgan. Shu dozatorlardan ham ayrimlari mutlaqo talabga javob bermaydi.
2024-yilning 9 oyi davomida Sog‘liqni saqlash vazirligining Sanitariya-epidemiologik osoyishtalik va jamoat salomatligi qo‘mitasi tomonidan tekshiruvlar o‘tkazilgan. Natijada tuz ishlab chiqaruvchi korxonalardan olingan 263 ta namunadan 65 tasida (25 foiz), savdo va umumiy ovqatlanish shoxobchalaridan olingan 1110 ta namunaning 347 tasida (31,5 foiz), maktabgacha va maktab ta’limi muassasalaridan olingan 3613 ta namunaning esa 1263 tasida (35 foiz) yod miqdori belgilangan talabga javob bermasligi aniqlangan.
Shu bilan birga o‘rganishlar davomida Sirdaryo viloyatida hech qanday hujjatsiz tuzni qayta ishlash, saqlash, qadoqlash va tashish faoliyati bilan noqonuniy shug‘ullanib kelayotgan 4 ta korxona aniqlangan.
“Ushbu korxonalarda tuzni yodlash dozatorlari mavjud emas. Omborlarda mahsulotlarni saqlash qoidalariga amal qilinmagan, qayta ishlab chiqarish uchun keltirilgan birlamchi tuzlarning tegishli hujjatlari, xususan sertifikatlari mavjud emas. Tuz belgilangan talabga javob bermaydigan paketlarga qadoqlanmoqda. Mahsulot ishlab chiqarilgan sanalar ko‘rsatilmagan holda sotuvga chiqarilmoqda. Ayrim hollarda qadoqlarga yodlangan osh tuzi deb, aslida yodlanmagan texnik tuz solinayotgani aniqlangan”, — deyiladi xabarda.
Ta’kidlanishicha, ayrim tadbirkorlar tegishli qonunchilik hujjatlarida belgilangan imtiyozlarni suiiste’mol qilib, aholining sog‘lig‘i uchun zararli bo‘lgan mahsulotlarni sotishni davom ettirmoqda.
“Majlis yakunlari bo‘yicha qo‘mitalarning aniq takliflar aks etgan qo‘shma qarori qabul qilindi”, — deyilgan qo‘shma majlis yakuni bo‘yicha xabarda.
