Samarqand viloyati Qo‘shrabot tumanida fuqarolar kerakli ruxsatnomalari bo‘lmay turib maktab va bog‘chalarda ilon tomoshasi o‘tkazgani aniqlandi. Bolalar ombudsmani so‘rovi asosida IIV holatni o‘rgandi.
Unga ko‘ra, 24-oktabr kuni tumandagi bog‘chada Ishtixon tumanida yashovchi B.M. va I.B. 60 nafarga yaqin tarbiyalanuvchining ko‘z o‘ngida bo‘g‘ma ilon (Qizil kitobga kiritilgan, noqonuniy ravishda saqlangan yo‘lbars pitoni, uzunligi — 2,50 metr) bilan sirk tomoshasi namoyish qilgan.
B.M. faoliyat yurituvchi MCHJda Qo‘shrabot tumani hududida 2024-yil 31-dekabrgacha zamonaviy sirk tomoshalarini o‘tkazish uchun ruxsatnoma bo‘lsa-da, unda ilon o‘yini ko‘zda tutilmagan, ta’kidladi bolalar ombudsmani.
Tekshirish davomida ushbu shaxslar pul evaziga tumandagi 8 ta maktabda ham mazkur bo‘g‘ma ilon tomoshasini o‘tkazgani aniqlandi, ularda jami 840 nafar o‘quvchi tomoshabin bo‘lib ishtirok etgan.
26-noyabrda noqonuniy saqlangan yo‘lbars pitoni mutaxassislar ishtirokida hujjatlashtirilib, viloyat ekologiya boshqarmasiga tegishli tartibda topshirildi. O‘z navbatida, boshqarma jonzot Zarafshon milliy tabiat bog‘i reabilitatsiya markazida bog‘ mutaxassislari tomonidan maxsus ko‘rikdan o‘tkazilayotgani va vaqtincha saqlanayotganini ma’lum qildi.
Tergovga qadar tekshiruv harakatlari boshlandi, vaziyatga huquqiy baho berish yuzasidan qonuniy choralar ko‘rilmoqda, deyiladi xabarda.
Qayd etilishicha, bolalar ombudsmani ta’lim muassasalarida bolalar xavfsizligiga zid ushbu tomoshalarga yo‘l qo‘yganlarga tegishli chora ko‘rish va kelgusida bunday noqonuniy harakatlarni oldini olish yuzasidan mutasaddilar bilan ishlamoqda.
