“O‘zavtosanoat” aksiyadorlik jamiyati boshqaruvi raisi Ulug‘bek Rozikulov “O‘zbekiston 24” telekanaliga bergan intervyusida payshanba kuni prezidentga ko‘rsatilgan taqdimotdan so‘ng avtomobilsozlik sanoatini rivojlantirish rejalari bilan tanishtirdi.
Uning so‘zlariga ko‘ra, mahalliylashtirish dasturi doirasida kompaniya tomonidan mamlakat hududlaridagi 1299 ta korxona imkoniyatlarini o‘rganish bo‘yicha 16 ishchi guruhi tuzilgan. Natijada 162 million dollarlik bir yilda 700 taga yaqin import o‘rnini bosuvchi butlovchi qismlar ishlab chiqarishga tayyor 79 ta korxona tanlab olingan.
Rozikulovning aytishicha, bunday ishlar avtomobilsozlik sanoatida import hajmini sezilarli darajada kamaytiradi. Mahalliylashtirishni targ‘ib qilish markazi ham asosiy mahsulotlarni xomashyo va materiallar ko‘rinishida mahalliylashtirish imkoniyatlarini o‘rganmoqda.
“O‘zavtosanoat” yiliga 300 million dollarlik metall buyumlar, shuningdek, elektrotexnika mahsulotlari, aralashma (polimer tarkibi, sopolimerlar va eritmalar aralashmasi), sintetik mato, sun’iy charm import qiluvchi yirik korxona hisoblanadi.
Shu munosabat bilan kompaniya “ishonchliroq sherik bo‘lish va buni amalga oshirishni xohlovchi xususiy korxonalar o‘rtasida ishonchni shakllantirish” maqsadida xususiy yetkazib beruvchilar bilan offtake shartnomalarini (korxonaning ishlab chiqarilmagan mahsulotlarini qaytarib sotib olish bo‘yicha shartnoma) tuzishga tayyorligini bildirdi.
“Mahalliy korxonalar bilan ishlash bu importni yiliga o‘rtacha 500 million dollarga qisqartirish imkoniyatini yaratadi”, — deya qo‘shimcha qildi Ulug‘bek Rozuqulov.
Prezident bilan uchrashuvda sohada ishlab chiqarish tannarxini kamaytirish masalasi ham muhokama qilindi — bu ko‘rsatkichni 2,5 trillion so‘mga kamaytirish rejalashtirilgan, dedi u.
Korxona rahbarining aytishicha, prezident ish o‘rinlari yaratish bo‘yicha topshiriqlar bergan. “Avtosanoat nafaqat mahsulot ishlab chiqaradigan, balki mamlakatda ish o‘rinlari tizimini yaratuvchi soha bo‘lishi kerak. Agar avval tayyor mahsulot ishlab chiqaruvchi korxonalar yoki mahalliylashtirish korxonalaridagi ish o‘rinlari haqida gapirgan bo‘lsak, bugun prezident topshirig‘iga ko‘ra yondashuv o‘zgardi. Biz, jumladan, hududlarda xizmat ko‘rsatish tizimini yaratishga o‘z hissamizni qo‘shishimiz kerak, deb hisoblaymiz va bu [ish o‘rinlari yaratish] imkoniyatlarimizni oshiradi”, — dedi “O‘zavtosanoat” rahbari.
Ulug‘bek Rozikulov mazkur dasturda 2030-yilgacha avtomobilsozlik sanoatiga bevosita va bilvosita bog‘liq bo‘lgan 1 million ish o‘rni yaratish ko‘zda tutilganini ta’kidladi.
Avtomobil bozoridagi ishlab chiqarish va iste’mol tarkibidagi o‘zgarishlar sharoitida kompaniya 2030-yilgacha bo‘lgan strategiyani ishlab chiqish uchun Boston Consulting Group (BCG) xalqaro maslahatchisini yolladi.
“1, 2 oy ichida ular bilan strategiya [ishlab chiqish] yakunlanadi. Har ikkala korxonamizning xatti-harakatlari va davlat, banklar, ishlab chiqaruvchilar tomonidan amalga oshirilishi lozim bo‘lgan chora-tadbirlar va korxonalarni yanada rivojlantirish uchun bizga qanday shart-sharoitlar zarurligi bilan bog‘liq hujjatlarning to‘liq to‘plami haqida alohida ma’lumot beramiz. Xususan, savdo tizimini modernizatsiya qilish zarur”, — dedi u.
“O‘zavtosanoat” rahbari avtomobilsozlik sohasida hali foydalanilmayotgan katta imkoniyatlar va zaxiralar mavjudligini ta’kidladi.
“Bu zaxira va salohiyatdan foydalanish bo‘yicha oldimizda vazifalar katta. Shuncha yildan beri davlat qo‘llab-quvvatlab kelmoqda, albatta, davlat rivojlanishida o‘zimizning salmog‘imizni ko‘paytirish nuqtai nazaridan vazifalar qo‘yilgan”, — dedi u.
Eslatib o‘tamiz, 5-dekabr kuni bo‘lib o‘tgan yig‘ilishda prezidentga O‘zbekistonda avtomobilsozlikni rivojlantirish bo‘yicha takomillashtirilgan chora-tadbirlar taqdim etildi. Shavkat Mirziyoyev mamlakat JSTga a’zo bo‘lgandan keyin raqobat kuchayishi hisobiga mahsulot sifati va mahalliylashtirish darajasini oshirish ustida ishlash zarurligini ta’kidladi.
