Qirg‘iziston prezidenti “Sukunat to‘g‘risida”gi qonunni imzoladi

Qirg‘iziston Respublikasi prezidenti Sadir Japarov “Sukunat to‘g‘risida”gi qonunni imzoladi, deb xabar berdi uning matbuot xizmati.

Ushbu qonun fuqarolarning sog‘lig‘ini yo‘l qo‘yiladigan darajadan ortiq bo‘lgan tovush bosimi va shovqinning zararli ta’siridan muhofaza qilish maqsadida qabul qilingani aytiladi. Qonun aholining tinchligi va dam olish vaqtini ta’minlash bilan bog‘liq munosabatlarni tartibga solishi keltirilgan.

Jumladan, tinchlik va osoyishtalik buzilishidan muhofaza qilinishi lozim bo‘lgan obyektlar (binolar) va hududlar ro‘yxati hamda tovush bosimi va shovqinning belgilangan darajalaridan oshib ketishiga yo‘l qo‘yilmaydigan vaqt davrlari belgilanmoqda.

Bu vaqt ish kunlarida — soat 22:00 dan 07:00 gacha; dam olish va bayram kunlari — soat 22:00 dan 09:00 gachadir.

Fuqarolarning tinchligi va osoyishtaligini buzuvchi harakatlar, jumladan, quyidagilar tasnif etilmoqda:

• tovush bosimi va shovqinning yo‘l qo‘yiladigan darajalaridan, xususan, transport vositalariga, savdo obyektlariga, ko‘ngilochar muassasalarga hamda umumiy ovqatlanish xonalariga o‘rnatilgan televizorlar, radiopriyomniklar va boshqa tovush chiqarish qurilmalaridan, shuningdek, tovushni kuchaytirish qurilmalaridan foydalanish;
• musiqa asboblarini chalish, hushtak chalish, qo‘shiq aytish, tovush bosimi va shovqinning yo‘l qo‘yiladigan darajasidan ortiq tovushlar bilan birgalikdagi boshqa harakatlar;
• qoidabuzarlar tomonidan ishlab turgan qo‘riqlash signalizatsiyasi, transport vositalari signalizatsiyasining tovush signallarini uzish bo‘yicha o‘z vaqtida choralar ko‘rilmagani, zaruratsiz tovush signallaridan foydalanilgani yoki transport vositasi yordamida boshqa shovqin effektining hosil qilingani, bu esa dam olish vaqtida sukunat buzilishiga olib kelgani;
• pirotexnika vositalaridan foydalanish;
• ta’mirlash, tushirish-yuklash, yig‘ish va boshqa turdagi ishlarni bajarish, odamlarning dam olish vaqtida sokinlik buzilishiga sabab bo‘lgan mexanik vositalar va texnik qurilmalarning ta’siri;
• belgilangan vaqtda himoya qilinishi lozim bo‘lgan hududlar va xonalarda fuqarolarning tinchligi va osoyishtaligi buzilishiga olib kelgan boshqa harakatlar.