Shu kunlarda O‘zbekiston bo‘ylab havo harorati sezilarli darajada pasaygan. Bunday sharoitda tetik va sog‘lom yurish uchun ovqatlanish ratsioniga alohida e’tibor qaratish talab etiladi, deya yozdi Sog‘liqni saqlash vazirligi va qator tavsiyalar bilan bo‘lishdi.
Qayd etilishicha, sovuq kunlarda organizm o‘zini o‘zi isitishi uchun juda ko‘p energiya sarflaydi. Natijada tana ko‘proq vitamin va minerallar, ayniqsa, oqsil moddasini talab qiladi. O‘z navbatida, uning tarkibidagi aminokislotalar immunitetni mustahkamlab, mikroblarga qarshi kurashda yordam beradi. Bu esa o‘tkir respirator virusli infeksiyalar keng tarqalgan hozirgi mavsumda ayni muddaodir.
Sovuq kunlarda tanaga issiqlik baxsh etuvchi taomlar iste’mol qilish foydali. Tarkibida issiqlik saqlovchi yeguliklarga grechka va jo‘xori yormalari, piyoz, sarimsoqpiyoz, yerqalampir, qalampir, zira, turshak, mayiz, baliq, qo‘y, mol, tovuq go‘shti, sut mahsulotlari, zanjabil choyi, arpabodiyon choyi va qahva kabi mahsulotlar kiradi.
Nutritsiologlar vazn tashlash uchun qishda parhezdan foydalanishni tavsiya etmaydi. Aksincha, aynan shu vaqtda organizm dam olishi va kuch yig‘ishi kerak.
Sovuq mavsumda qizil va qora qalampir, zanjabil, dolchin kabi issiq ziravorlardan foydalanish tavsiya etiladi. Ularning tarkibidagi qizdiruvchi moddalar ovqat hazm qilish tizimining retseptorlarini qo‘zg‘ab, qonni tomirlar bo‘ylab tezroq aylanishi va issiqlikni ta’minlaydi.
Qishda kam miqdorda yog‘li go‘sht iste’mol qilib turish ham zarar qilmaydi. Unda sovuqqa qarshi turish uchun zarur bo‘lgan arxidon kislotasi mavjud. Vitaminlarga boy mol, qo‘y jigari qishda A vitamini manbai sifatida organizm uchun zarur bo‘ladi. Xamirli ovqatlar ham tanani isitish uchun xizmat qiladi. Bunday taomlar qish uchun juda mos keladi.
Issiq, to‘yimli ovqat iste’mol qilish qishning sovuq kunlarida odamlarning kayfiyatiga ijobiy ta’sir qiladi. Ayniqsa, tovuqli sho‘rva organizmda proteinning kerakli darajasini saqlab qolish uchun muhim taomdir.
Shakar iste’molini cheklash salomatlik uchun ahamiyatli. Issiq va achchiq qahva organizmga undan ko‘ra ko‘proq tetiklik bag‘ishlaydi.
