Yevropa Ittifoqi Suriyaning yangi rasmiylari bilan Rossiya harbiy bazalarini mamlakatdan olib chiqishni muhokama qilishni rejalashtirmoqda, deb xabar berdi Politico Ittifoqning Tashqi ishlar va xavfsizlik siyosati bo‘yicha oliy vakili hamda Yevropa komissiyasi vitse-prezidenti Kaya Kallasga tayanib.
Kallasga ko‘ra, Yevropa Ittifoqi mamlakatlarining “ko‘pgina tashqi ishlar vazirlari” Suriyada Rossiya harbiylari bo‘lmasligi tarafdori. Ularning fikricha, YeI diplomatiyasi rahbari “bu Suriyaning yangi rahbariyati uchun shart bo‘lishi kerak”, — dedi. Kallas bu masala “Suriya rasmiylari bilan uchrashuvlarda ko‘tarilishi"ni ta’kidladi.
Yevropa Ittifoqi sobiq prezident Bashar Asadni taxtdan ag‘dargan isyonchilarga murojaat qilmoqda va blok yangi hokimiyatni rasman tan olishdan yoki rasmiy diplomatik munosabatlar o‘rnatishdan oldin bajarilishi kerak bo‘lgan bir qator shartlarni belgilab berdi, dedi Kallas. YeI avvalroq Asad hukumati bilan barcha diplomatik aloqalarni to‘xtatgandi.
Rossiyaning Suriyadagi Tartus va Latakiya hududlarida harbiy bazalari bor. Ma’lum qilinishicha, Rossiya hukumati Suriyaning yangi hukumati bilan ularni saqlab qolish bo‘yicha muzokaralar olib bormoqda.
Dushanba kuni Estoniya sobiq bosh vaziri “Hayyat Tahrir ash-Shom” kabi guruhlar bilan aloqa o‘rnatish uchun Suriyaga Yevropa Ittifoqi diplomatini yuborayotganini ma’lum qilgandi. Bu harakat AQSh davlat kotibi Entoni Blinkenning Vashington guruh bilan to‘g‘ridan-to‘g‘ri aloqada ekanini aytganidan keyin sodir bo‘ldi, deb yozadi Politico.
Dekabr oyi boshida Bashar Asadni prezidentlikdan ag‘dargan Suriyaning yangi hukumati hozircha Rossiya harbiy kontingenti ishtirokiga munosabati haqida rasmiy bayonot bermadi. Biroq Kreml matbuot kotibi Dmitriy Peskov: “Rossiyaning Xmeymim va Tartusdagi bazalarini saqlab qolish haqida gapirishga hali erta, bu Suriyani boshqaradiganlar bilan muhokama mavzusidir”, — deya javob bergan.
