Shavkat Mirziyoyev 18-dekabr kuni Tashkent Pharma Park innovatsion ilmiy-ishlab chiqarish farmatsevtika klasteriga tashrif buyurdi.
Majmua davlat rahbarining 2020-yil 28-yanvardagi qarori asosida tashkil etilgan bo‘lib, o‘sha yilning 17-aprelida uning qurilishiga tamal toshi qo‘yish marosimi bo‘lib o‘tgan.
Birinchi bosqichda qariyb 20 gektar maydonda texnopark barpo etilmoqda. U ma’muriy markaz, tadqiqot va rivojlanish markazi (R&D), farmatsevtika mahsulotlari xavfsizligi laboratoriyasi, klinik tadqiqotlar markazi, Farmatsevtika texnik universiteti hamda vivariyni o‘z ichiga oladi.
Bugungi kunda ma’muriy markaz qurib bitkazilgan. 11 qavatli ushbu binoda Farmatsevtika tarmog‘ini rivojlantirish agentligi, konferensiya zali, kovorking markazi, biznes inkubator, kutubxona, soha tarixi muzeyi joylashgan.
Klasterdan asosiy maqsad — yuqori texnologiyalarni joriy etish orqali mamlakat farmatsevtika tarmog‘ini rivojlantirish, xalqaro innovatsion tizimga integratsiyalashish, yuqori sifatli dori vositalari, tibbiy buyumlar va tibbiy texnikani ishlab chiqarish, malakali mutaxassislar tayyorlash.
Ushbu keng ko‘lamli maqsadlardan kelib chiqib, Toshkent viloyati Zangiota tumanidan 190 gektar yer maydoni ajratilgan.
Qayd etilishicha, sanoat zonasida umumiy qiymati 818 million dollarlik 21 ta loyiha amalga oshirilmoqda. Ularning birinchisi — Grand Pharm Logistics Hub tomonidan 40 million dollarlik distribyutorlik markazi ishga tushirildi va 300 dan ortiq ish o‘rni yaratildi. Korxonalar Turkiya, Hindiston, Xitoy, Malayziya, Birlashgan Arab Amirliklari, Rossiya bilan hamkorlikda tashkil etiladi.
Kelgusida sanoat zonasi hududida umumiy qiymati 620 million dollarlik 20 ta loyihani amalga oshirish rejalashtirilgan.
Klasterda yuqori sifatli dori-darmonlar va tibbiy buyumlar ishlab chiqariladi, import bo‘layotgan mahsulotlar mahalliylashtiriladi, 8 ming ish o‘rni yaratiladi. Zarur amaliyotlar markazi (GxP) tovarlarning tayyorlanishidan iste’molchiga yetib borishigacha bo‘lgan barcha bosqichlarda xalqaro standartlarga muvofiqlik va sifatni ta’minlashga ko‘maklashadi.
Davlat rahbariga klaster tarkibiga kiruvchi Farmatsevtika texnika universiteti haqida ham ma’lumot berildi.
Universitetda farmakopeya markazi, kutubxona, sport majmuasi, o‘qituvchilar va chet ellik xodimlar uchun turar joy bo‘ladi. Sanoat farmatsiyasi, biokimyo va biotibbiyot, biotexnologiya, biofarmatsevtika, bioinformatika kabi yo‘nalishlarda yuqori malakali mutaxassislar tayyorlanadi. Buning uchun ta’lim xalqaro dasturlar asosida yo‘lga qo‘yiladi, mikrobiologiya, biotexnologiya, xujayra biologiyasi, farmakologiya, tahliliy kimyo kabi laboratoriyalar tashkil etiladi.
Universitet joriy o‘quv yilida o‘zining ilk talabalarini qabul qildi. Prezident ular bilan suhbatlashdi.
“Biz rivojlangan davlatlardan investorlar olib kelyapmiz. Ular O‘zbekistonga qanday qilib baho beradi? Sizlar bilan muloqot qilib. Mamlakatimizning boyligi — yoshlar! Farmatsevtika bo‘yicha ham eng yaxshi dasturlarni qo‘llab, kelajak uchun mutaxassislarni tayyorlab olmasak, boshqalarga pul to‘laymiz, bog‘liq bo‘lib qolamiz. Shuning uchun zamonaviy universitet tashkil qilib, dual ta’limni yo‘lga qo‘yyapmiz. Bu yerda ham bilim olasizlar, ham o‘qiganlaringizni amalda qo‘llash imkoniyatiga ega bo‘lasiz”, — dedi Shavkat Mirziyoyev.
Universitet bitiruvchilariga Yonse (Janubiy Koreya), Sanderlend va De Montfort (Buyuk Britaniya) universitetlarining xalqaro diplomlari topshiriladi. Bundan tashqari, Dandi, Pusan va Purdyu universitetlari bilan ilmiy hamkorlik yo‘lga qo‘yilgan.
