Yangilandi: AQSh prezidenti Jo Bayden federal hukumat faoliyatini moliyalashtirishni davom ettirish to‘g‘risidagi qonunni imzoladi.
AQSh Kongressi Senati 21-dekabrga o‘tar kechasi hukumat faoliyatini moliyalashtirishni uzaytiruvchi qonun loyihasini yoqlab ovoz berdi, deb xabar bermoqda CNN. Hujjatni kongress yuqori palatasining 85 a’zosi qo‘llab-quvvatladi, 11 nafari qarshi chiqdi.
Senatorlar qonun loyihasini mahalliy vaqt bilan yarim kechadan keyin (21-dekabr soat 8:00 da) ovozga qo‘ydi. Texnik jihatdan bu moliyalashtirish muddati tugaganidan keyin sodir bo‘ldi, ammo hujjatning qabul qilinishi hukumat idoralari ishini to‘xtatib qo‘yishdan qochish imkonini berdi.
Vakillar palatasi, kongressning quyi palatasi qonun loyihasi uchun 20-dekabr kuni kechqurun ovoz berdi. 366 nafar kongressmen yoqlab, 34 nafari qarshi ovoz berdi. Shu haftaning boshida Vakillar palatasi ikki marta qonun loyihasini qabul qila olmagandi.
Qonun loyihasi Kongressning ikkala palatasi tomonidan ma’qullanganidan so‘ng u AQSh prezidenti Jo Baydenga yuborildi.
O‘tgan yili federal hukumat taxminan 6,2 trillion dollar mablag‘ sarfladi va hozirda 36 trillion dollardan ortiq qarzi mavjud, deb yozadi Reuters. Kongress kelasi yil o‘rtalarigacha qo‘shimcha qarz olishga ruxsat berish bo‘yicha qaror qabul qilishi zarur bo‘ladi.
Yangi qonun loyihasi hukumat moliyalashtirishini 14-martgacha uzaytirish, tabiiy ofatlardan zarar ko‘rgan shtatlar uchun 100 milliard dollar va fermerlar uchun 10 milliard dollar ajratishni ko‘zda tutadi. Shuningdek, yil oxirida muddati tugaydigan qishloq xo‘jaligi va oziq-ovqat yordami dasturlarini uzaytirish ham rejalashtirilgan. Loyiha AQShning saylangan prezidenti Donald Tramp erishmoqchi bo‘lgan davlat qarzi chegarasini oshirmaydi.
Qonun loyihasi haqida
Federal idoralarni moliyalashtirish muddati uzaytirilmasa, AQSh hukumatida ishni to‘xtatish (shatdaun) xavfi yuzaga kelishi mumkin edi, ammo bunday bo‘lmadi.
Qonun loyihasida hukumat moliyalash muddatini uch oyga uzaytirish, tabiiy ofat oqibatlarini bartaraf etish uchun 110 milliard dollar va hukumat qarzining chegarasini 2027-yil yanvarigacha ikki yilga to‘xtatib turish ko‘zda tutilgandi. Qarz limitini bekor qilish saylangan prezident Donald Trampning talabi edi — bu unga saylov kampaniyasi davomida va’da qilingan soliq islohotini amalga oshirish, soliqlarni keskin qisqartirish imkonini beradi.
Hujjat Tramp va milliarder Ilon Mask Vakillar palatasi spikeri Mayk Jonson demokratlar bilan erisha olgan avvalgi ikki partiyaviy kelishuvni tanqid qilganidan keyin Respublikachilar partiyasi tomonidan shoshilinch ravishda taklif qilingan. CNN hisob-kitoblariga ko‘ra, Mask o‘zining X ijtimoiy tarmog‘ida (sobiq Twitter) saylov kuni ko‘p oylar davomida tayyorlanayotgan ikki partiyaviy kelishuvni tanqid qiluvchi 92 ta post e’lon qilgan.
