AQSh Davlat departamenti Belarusga sayohat qilishni rejalashtirayotgan amerikaliklar uchun yangilangan tavsiyalarni e’lon qildi.
“Belarus rasmiylarining mahalliy qonunlarni o‘zboshimchalik bilan amalga oshirishi, hibsga olish xavfi, Rossiyaning Ukrainaga qarshi urushini osonlashtirishda davom etishi, fuqarolar tartibsizliklari ehtimoli va elchixonaning Belarusda yashovchi yoki sayohat qilayotgan AQSh fuqarolariga yordam berish imkoniyatining cheklangani sababli Belarusga bormang”, — deyiladi xabarda.
Belarusda bo‘lgan AQSh fuqarolari zudlik bilan mamlakatni tark etishlari kerak.
Belarus ikki fuqarolikni tan olmaydi. Belarus hukumati AQSh-Belarus fuqarolarining ikki tomonlama fuqaroligini tan olishdan bosh tortishi va hibsga olingan ikki tomonlama fuqarolarga AQSh konsullik yordamini rad etishi yoki kechiktirishi mumkin.
Belarus hukumati o‘n minglab shaxslarni, jumladan, AQSh fuqarolari va boshqa chet el fuqarolarini muxolifat partiyalariga aloqadorligi va siyosiy namoyishlarda ishtirok etgani uchun hibsga olgan, hatto bu aloqadorlik Belarus tashqarisida sodir bo‘lgani haqida dalillar bo‘lsa ham. Hozirda Qo‘shma Shtatlarda jinoyat deb hisoblanmaydigan siyosiy harakatlar uchun 1300 ga yaqin mahbus qamoqqa olingan. Belarus hukumati mahbuslarga elchixona va advokatlar bilan uchrashish, qamoqxonalardan tashqarida oila a’zolari bilan muloqot qilish va ma’lumot olishni taqiqlagan", — deya qayd etdi Davlat departamenti.
“Belarusdagi qamoqxonalardagi sharoitlar juda yomon. Namoyishlar atrofida bo‘lgan AQSh fuqarolari hibsga olindi. Ba’zilariga Belarus rasmiylari tomonidan tazyiq va/yoki yomon munosabatda bo‘lingan. Belarus rasmiylari qonun va qoidalarni notekis qo‘llamoqda, mustaqil va xorijiy ommaviy axborot vositalari bilan aloqador shaxslarni nishonga olgan.
AQSh fuqarolariga ommaviy namoyishlardan qochish tavsiya etiladi. Hukumat namoyishchilarni, jumladan, tinch namoyishchilarni tarqatish uchun kuch ishlatgan, deyiladi ogohlantirishda.
AQSh Davlat departamenti Minskdagi elchixonasining faoliyatini keng ko‘lamli Rossiya-Ukraina urushi boshlanganidan ko‘p o‘tmay, 2022-yil 28-fevralda to‘xtatgan. O‘shanda Davlat departamenti amerikaliklarga mamlakatni tark etishni tavsiya qilgan. Keyinchalik AQSh Belarusga sayohat qilish bo‘yicha o‘z tavsiyalarini bir necha bor yangilagan.
