Rossiya prezidenti Vladimir Putin mamlakatda bo‘lgan noqonuniy muhojirlar o‘z maqomini tartibga solishi yoki 2025-yil 30-aprelgacha mamlakat hududidan chiqib ketishi shartligi to‘g‘risidagi farmonni imzoladi. Tegishli farmon Huquqiy hujjatlar rasmiy portalida e’lon qilindi.
Patentni rasmiylashtirish uchun quyidagilar zarur:
- pasport yoki shaxsni tasdiqlovchi boshqa hujjat va uning rus tilidagi notarial tasdiqlangan tarjimasi;
- rus tilini bilish, Rossiya tarixi va qonunchiligi asoslari to‘g‘risidagi hujjat;
- ixtiyoriy tibbiy sug‘urta polisi yoki pulli tibbiy xizmatlar ko‘rsatish to‘g‘risidagi shartnoma;
- OIV infeksiyasi yo‘qligi to‘g‘risidagi sertifikat — 1 yil amal qiladi;
- organizmda giyohvand moddalarning yo‘qligi to‘g‘risidagi xulosa — 1 yil;
- xavfli yuqumli kasalliklar yo‘qligi to‘g‘risidagi tibbiy xulosa — 1 yil;
- patent, ishlashga ruxsatnoma, vaqtincha yashash, o‘qish yoki yashash guvohnomasini berishni rad etish uchun asoslar mavjud emasligi, shuningdek boshqa talablar bajarilishi.
Farmonga ko‘ra, harbiy xizmatni o‘tash uchun Mudofaa vazirligi bilan shartnoma tuzgan muhojirlar deportatsiya qilinmaydi. Ularga nisbatan deportatsiya, readmissiya, Rossiyaga kirishga ruxsat bermaslik, mamlakatda bo‘lishni istamaslik va vaqtincha bo‘lish muddatlarini qisqartirish bo‘yicha ilgari qabul qilingan qarorlar ijro etilmaydi. Bu qoida Rossiya milliy xavfsizligiga tahdid soladigan xorijliklarga nisbatan qo‘llanmaydi.
Putin iyun oyida bo‘lib o‘tgan Sankt-Peterburg xalqaro iqtisodiy forumining yalpi sessiyasi doirasida Rossiyada migratsiya siyosatini o‘rganishga qaytish kerakligini, bu muammo yo‘qdek ko‘rinmaslik kerakligini aytgandi. Uning ta’kidlashicha, Rossiyada migrantlarga ehtiyoj bor, chunki ichki kuchining yo‘qligi iqtisodiy o‘sishni cheklaydi.
Davlat dumasi migrantlar bilan bog‘liq bir nechta tashabbuslarni qabul qilmoqda. Masalan, noqonuniy migratsiyani tashkil etish bilan bog‘liq jinoyat normalari, bu sohadagi soxta hujjatlar bilan bog‘liq ma’muriy normalar kuchaytirildi. Muhojirlar uchun noqonuniy xizmat ko‘rsatuvchi saytlarni suddan tashqari bloklashga ruxsat berildi, rus tili bo‘yicha imtihonlarni qabul qilish jarayonidan vositachilar chiqarib tashlandi.
Prezident matbuot kotibi Dmitriy Peskov, o‘z navbatida, keskin demografik vaziyat fonida mamlakatni jadal rivojlantirish uchun Rossiya boshqa davlatlardan kelgan mehnat migrantlariga muhtojligini tushuntirdi. Shu sababli mamlakat migrantlarning kelishini olqishlaydi, deya qo‘shimcha qildi u.
- Sentabrda RF Davlat dumasi raisi Vyacheslav Volodin mehnat muhojirlariga o‘z oilalarini mamlakatga olib kelishni taqiqlovchi qonun loyihasi tayyorlanayotganini ma’lum qilgandi.
- Moskvadagi “Krokus siti holl”da 140 dan ortiq odam halok bo‘lgan, yana 500 dan ortig‘i jarohatlangan teraktdan so‘ng Rossiya hukumati migrantlarga qarshi ritorikasini kuchaytira boshladi. ISHID-Xuroson (ISHID-K) hujum uchun javobgarlikni o‘z zimmasiga oldi. Bu ishda Markaziy Osiyo davlatlaridan kelgan migrantlar gumonlanmoqda.
